دلوقتي

دلوقتي

كلمات الشاعر /

محمود يحيى

دلوقتي خلاص مابقاش ليا حضن أرجع له

ولا دعوة صبر تهز الخير يطرح ليا ..

دلوقتي بقيت في الدنيا وحيد

والخوف بيحوم من حواليا

والليل حَوّد يَمْ عيوني وفرد دمعُه فوق المراسيل .

ببعتلك أول مره جواب مالهوش عنوان

برسم شكلك جوه حروفي

وبشوف صورتك في العتمه خيال ..

مجنون .. رحال

شاعر بالعافيه ماليش موال

وكإن ما عمري كتبت قصيد ..

أهرب .. ف تصيد روحك قلبي

أسكت .. ودموعي ما بتخبي

وكإن الخوف تاري وذنبي

ومافيش للعمر بلاكي لزوم ..

مستور في الدنيا لكن محروم

ناقصاني حاجات معرفش أوصفها بأي كلام

حاسس بفراغ جوه ف روحي

وصداكي بينهش أوتاري على لحن حزين ..

-سايباني لمين-

مش من عادتي أقولك .. آسف

بس المره دي أنا نفسي بجد تسامحيني ..

غلطي النوبه هو حنيني ..

ومقدرش أتوب .

إزاي بعد ما كنت معاكي أصبح مغلوب

وازاي تهزمني الدنيا عشان حبيت فيكي

وازاي عرفت تمسك جدا نقطة ضعفي

وتصب المُر كاسات وغروب .

في ناس ف حياتنا ماتتبدلش .

وقصايد صعبه من الأفضل إنها تتقال مره وحيده .

كلمات الشاعر /

محمود يحيى