أخر معركة

في أخر معركة بيننا

وأنا مَرمي بدون الحَشد

وإيدي الفارغة بتسبَح

(بإسم الله)

ما عاد فـ حروبي شيء رابح

ماعاد فيا أمل لحياة

ماعاد كَسري يضيف ليكي

غنايمِك للأسف مأساة

انا أضعف من إنك تنصُبي عتادِك

ولا تحاوري

يادوبك بس هَتشاوري

هَينزِل سيفٌك البتار يطيح بيا

مفيش ولا حاجة أبدية

سوىَ بس

(البقاء لله )

نزلت خلاص

ورافع كفتين تَسليم

في إيدِك وحدِك التهشيم

فـ لو فيا مكان جازلك

تدوسي بقوتك فوقه

ياريت تتراجعي مش مكسب

انا  بأشبه لتوب أبيض

ما تجني غير جُثث جواه

غريبة إنتي

وقفتي بكل أسلحتِك

وسال الدم فاق ريحتِك

ياريتني بموتي رَيحتِك

هَتاخدي  اللي إنتي مش عاوزاه

وعارف كل يوم هَيفوت

وأنا مجهول مَليش سيرة

هَتبقي ونيسة الحيرة

وشغفِك للعراك يشتَد

مَشوفتش عُمري فرحة حَد

يسببها وجود الخصم

كإن رَحيلي بخسايري

هَيبليكي بهزَل فـ الجسم

كإن وجودي بيمدِك وبيشدِك

لحصد الجُرم والإثبات

وتحقيق الشعور بالذات

كإن الإنتقام لَذات

وأنا مَقدَرش أكون ضدِك

خلاص سَلِمت مين قدِك

كسرتي القوة بالجبروت

نسيتي إن الزمن هَيفوت

وبعد الموت باقيلي حياة

كلمات الشاعر الراحل

أدهم الزهيرى