……..عم عاطف……..

……..عم عاطف……..

كلمات الشاعر
وحيد علي الجمال

عم عاطف حد اطيب م الخيال
ليل نهار ع الترعة واقف له زمان
يغسل المايه اللي جايه م الذنوب
يدعك الهم اللي فاضل في الدروب
كفة ايده منه باش
عدى من توب القماش
مش بيحسب كام هيبقى فالمعاش
او تاريخ لحظة وجوده او نزوله
جوه ارض الله بطوله ثم عاش
شعره نازل فوق كتاف الكادحين
يخطفك من قلب روحك
يحدفك في الجرح سابح
شك مقطوع الظنون
فجأة تغرق في الجنون
تغزلك وبالف نول
عم عاطف له سنين
واقف بطوله
مش مصاحب حد غيره
مش بيملك غير ضميره
عمره مرمي على الجسور
الشوارع راميه طوبته
مش بتسأل حتى عنه
أصله مش شايل هموم
كل يوم رايح وراجع
جيبه فاضي من المواجع
بس فاهم ايوه سامع ؟؟
حتى بيرد السلام
عمره يجي الف عام
مخطوطين فوق الملامح
محسوبين تحت الرموش
له ساعات مابنعرفوش
عم عاطف في الشوارع
طابعه مايحبش بيوت
كل يوم ع الترعة واقف
يكنس الوجع اللي باصص
من عيون الشده راكز
فوق جبين وشه العجوز
عم عاطف الصراحة معرفوش
بس انا صممت اصاحبة
واكسر الغربة اللي بينا
يمكن اعرف ايه حكايته
اصل وشه كان بشوش
وش غير كل الوشوش
رغم حالته وانطوائه
فيه كرامه وكبرياء
جوه حاله من الصفاء
بحسده فعلا عليها
عم عاطف قالوا عنه
عنده شعرة م الجنون
لو تعدي جنب منه او تفوت
عم عاطف باختصار
دار ما بينا كام حوار
رغم ان الجو نار
والهوى مليان عفار
راح خطفني وبثقافته
لخص الدنيا بكلامة
كبر الصورة في مقامة
عقدة العالم وكونه
ان فيه سادة وعبيد
جبر حق وحق جابر
واللى ظالم له منابر
خبى نفسه في الاكابر
لم في حقوق الغلابة
وان سألته يرد فاجر
روح يااااااعم في داهيه
غوووووور
طبع أكال الحقوق
حلمه حتى تشوفه زور
عم عاطف في الطناش
قالي تعرف تبقى شاش
لو لقيت الناس خانوك
وادعوا كدب وهانوك
من ذنوبهم ذنوبك
حطه تحت الجزمة عادي
وارمي منه للحدادي
واعصره وصفي في مرارة
واسقيهلهم و بلاش

كلمات الشاعر
وحيد علي الجمال