( تعيش وتفتكر )

( تعيش وتفتكر )

كلمات الشاعر
سعد الشرقاوى

,,,,,
لمّا عود العمر يدبل
بعد فترة لاخضرار
أو أشوف الليل بيطول
ينتظر طلعة نهار

لمّا يبقى الشعر لابيض
ع الجبين غطـّا السّمار
واللا تيجى سنان جديده
بعد طول الانتظار

لمّا يبقى الضّهر قوّس
وانحنى والعضم سوّس
أو أشوف الرّيق ملوّث
هدمتى ولون الغيار

يبقى ايه فاضل ياغالى
من جمالك والليالى
لو مفاجأه شلتهالى
ودّيهالى فى المزار

واوعه تنسى انا كنت مين
واللا بعدى تعيش حزين
دا الخطاوى المكتوبين
فاتوا من عروة زرار

ليّه عندك أحلى دين
فاتحة أوسورة يـس
وأمّا يدعوا تقول آمين
هيّا دى نهاية القرار

لو تعيش بعدى بيومين
بس تعرف انته فين
فيه رساله ف كلمتين
مكتوبين لك ع الجدار

فيهم العمرالطويل
فيهم الحلم الجميل
فيهم الامل العليل
فيهم الخير والمرار

هاتلاقيهم بين ايديك
محفورين قدّام عنيك
دنيا بتسلـّم عليك
قوم خلاص طلع النهار

كلمات الشاعر
سعد الشرقاوى