يا آخر كرسي كان شاغر ف قطر العمر
يا أخر حرف في قصيدتي اللي مش عارفه ح أقولها لمين
و رَشِّة عطر حايشاها ف أزازة الشوق
ونسمه شوق كانت بتعدي علي قلبي بقالها سنين
يا لهفة عيني ف أستطلاع هلال الشهر
ونظرة بعشق علي خلجات
يدق القلب ليها انين
ياخطوة ف حلم باقيالي
مابين ماصحي لحد ما أفوق
وشطر في جمله باعتاها وكان أملي تشوفها حنين.
وبتحسر علي عمري اللي ضاع مني
وأنا مش قادرة بيها أبوح
و مين أستدعى أحزاني
ومسمرها فى بيبان الهجر
وخلى الفرحة تنساني
ويأسرني الفراق والنوح
ويخطف فرحتي مني
اللي حجزاها بطلوع الروح
ومين شخبط ف
كراستي ولخبطلي
بيتين الشعر
برغم إن المعاد لسه
باقيله يومين !!
و ليه بالهجر أنا
حاسه وباتقلب
على الجنبين
ويرمي الملح ف
جفوني
وبيسهر دموع العين
ومين جاب لي هنا
طيفه وأنا ماعرفش
كان مع مين ؟
يأكد لي إنه مش
راجع
ولو حتى أنتظرته
سنين !!
و ليه الفكر يستخسر
ف عمري الحب
ويقلب لي بأحزانه
بشارة الوعد
ويقنعني إنه
كدب ف كدب
وتصبح آخر الأنباء
صيوان منصوب ف أفكاري
وصوت ماعرفش
جي منين
بيقرا الفاتحة
وبيختم بربع ياسين
ويستقبل عزاء
القلب !!
كلمات الشاعرة
هيومة حمزه
باكينام حمزه
Discussion about this post