صلاة دمعة …

كلمات الشاعر 

حمدان حلمي

صلاة دمعة …

مفيش غير دمعة جوايا

ومش راضية تخليني

أسلّم بيها على جرحي

ونفسي تبل ريق قلمي

عشان يمكن يقول حاجة

تهم قلوب بتستنظر

حروف مروية بالتصبيح

على الناس اللي بتدوّر

في جواها

عن الحتة اللي كان الليل

ما بيهوّبش يمتها

لأن النور ..

ما كانش بيختفي فيها

عشان بيشع من مواجيد

لأطفالها ..

بنظرتهم لباب أحلامهم المفتوح

على السموات

من الأرض اللي جُعلت بس للاجئين

يحاصروا اللي .. يحاصروهم

بزيتون الكتاب والتين

وتفقيه العيون في الروح

تلاقي البحر والنورس

بيتحاكوا بصمود ناسها

في قلب الأقصى والحمامات

هديلها يهذّب المواليع

عشان عشاق محاريبها 

ومن عرف إنهم شُهدا

بيفتح لاجلهم منامات

بضي الذات

ينادوا الشعر يتوضّىٰ

يروح ويصلّي في عيونهم

تلاقي بحوره صحايفهم

وطنها السلسبيل تراتيل

نايات ملكوت

كمنجات المدى قلوبها

مع قلوبهم كما قلبي

ما بيقولش إن نبضه جريح

عشان الدمعة الباقية

في نني تحن ع الأوتار

تخليّني ابتدع قافية

لغزة وتجري جري النيل

في جبهة كل من آمن

ورابط زيّها وزيي

نعيش نعصُر كمد عربي

يحسس قمحنا دايماً 

بأنه مهوش يتيم أبداً

وكل احلامه تتفسر

فمش لازم كنانة الله

تكون مانعة 

عشان مش باقي غير دمعة

في جوايا ..

بانزّلها عشان حتة

ضمير الأرض يتغنىٰ

بحنة صبرها فلسطين 

واموت إنسان !!!

كلمات الشاعر 

حمدان حلمي