تلقيمة ناي

حسنى منصور

وجعك تلقيمة ناى
على رعشة جرح كمنجة ،
وبوح نَسَّاى
لو كنت شايفنى …
خد ايد الروح ،
وادينى جناح
احساس صوفى
انوار كهاريب صدقى السارى
ابدأ من خوفى ،
واوجاعى
من اخضر صوتى النعناعى
لاشجار البوح
لمداين لسه بتتهجى
لهجة عاشق
هاستنى برقة زقزقتى ،
وشقاوة قلبى المتمادى
ف ترحال مواويل
انا روحى إن طلعت دلوقتى
هتفرق ع الغائبين
اشواق جوابات وحنين
وادخل ف سباق
ضارى الوحشة
مع روح البحر
يصطادنى اليود
اصطاد موجة ،
وانفد من ألمى بأعجوبة ،
واغافل ضعفى،
واستقوى
ارقى المسافات مليون رقوة ،
والحق ف البعد المواعيد
حواليا ما فيش ولا شىء ناقص ،
والكون ف براحى بيتراقص
رقصة مخمور ،
عصفور هربان للحرية
والدنيا إن كانت مش هية
فيه هناك تصريف
الماضى ماهوش فاضى يناوش
والليل ع الأرض
ماهوش عايش
حتى المستقبل …
صار ٱنى
والٱنى عيونه بتفتَّح …
على ضى جديد
الدنيا مش فاضية تعيشه
بس انا عايشه معاكى بتفاصيله
كان نفسى رجلى…
تمشى له
من قبل ما جرحى
يعلمنى تهتهة القول
من قبل الشعر ما يتجسد
تفعيلة روحى المقتولة
من قبل الصدمة ما تِرْهِبنى ،
وامشى السكة المجهولة
الموت فرصة
بيكحل عين المسافات ،
ويخللى لروحى …
كتير جناحات
تقدر ترمينى على جنة
فيها تلقيمة من شجن الناى
مع رعشة جرح كمنجة ،
على بوح نَسَّاى