أهل العزبة

سواقي العز شغـّاله

وصوت النسمة بينادي

فى ضل التوته رجّالة

ونجات بتغنيّ ع اليادي

فى راديو قد كف الايد

وصوته كان يجيب لبعيد

جايبله حجارة ليلة العيد

وعايش عمري ع الهادى

,,,,

ومتحزّم على توبي

بأوضـّب ع الدراع مايّه

وطابعة شق فى كعوبي

سايبها ع الزراعيّه

أصليّ الفجر واتمشىّ

واشيل السّرة فى العشـّه

ولمّا بهايمي تتعشه

تبان الضحكة فى عنيّه

,,,,

واروّح ألتقي مرتي

بتطبخ ع الكانون محشي

وريحة الأكل فى ايديّا

تغيب كام يوم ما تطلعشي

أصليّ واسمع الآخبار

واسهر حبّه فى الدوّار

وأشوفلى يوميّة فى الآنفار

ولو معذور أبيع جحشي

,,,,

وأرضى بالليّ مكتوبلي

وأنام الليل وأنا مرتاح

ووارث م الليّ كان قـًبلي

أشوف الشمس كل صباح

تبوس ورق الدّره لاخضر

وترمي شعاع بيتمخطر

ويرسم ع الندى منظر

بيسعد كل واد فلاح

,,,

وعشت وشوفت أولادي

على القهوة تبات صاحيه

وشاشة عرض وبيرقص

معاهم عمدة الناحية

وكل العزبه هللاسه

بيرغوا ف كورة وسياسة

لا عاد رتعه ولا رواسه

ولا نصّاب بدون لحية

,,,,

وحتى هريدي ولد كمال

لامم كام واد من العاطلين

ولابسلي عباية وشال

وداير يفتي باسم الدين

ويقعد للصباح يسكر

ويهتف يسقط العسكر

وبس علينا يتشطـّر

وقال احنا اللي ناس كافرين

,,,,

يا الف خسارة ع الطمبور

وع الساقية ساعة ما تدور

وع النورج وع المحرات

وع الارض اللي صبحت بور

باعوها مباني بالقراريط

وقبضوا فلوس ونسيوا الغيط

وصاحبوا كمان زعيط ومعيط

وطردوا الخير وطفـّوا النور

,,,,

لا عاد مكسب ولا حركة

ولا معروف ولا بركة

ما عاد غير غم وشتيمه

وكل دقيقة ميت عركه

قنابل تنسف الابراج

وأنا ميّت من الاحرج

خلاص قررت آخد إفراج

وأفض معاهم الشركة

كلمات الشاعر

سعد الشرقاوى