إشتقتلك يا إمّي …

بقلم الشاعرة … فاطمة البلطجي 

“إشتقتلك يا إمّي” 

 

يا إمّي 

بيكفي هالأد

طوّلتي الغيبة 

عن جد

والدمعة 

الحرقت هالخد

عمتسأل 

ومحتاجة الرد

عليّ ردّي 

وتعي لحدّي

وخلّي إيدك 

تمسك يدّي

وحكي كتير 

حاكيكي بدّي

وخبّي همّي 

بصدري وهدّي

ويخلص الوقت 

والزمن يعدّي

وأوقف تفل 

وتقولي ضلّي

هلأ جيتي 

بعد ما قعّدتي

وإتدلل عليك 

وقلك ما بدّي

صار وقت 

روح عبيتي

كإن بكرا 

شمسو عندي

ورحتي يا إمّي 

وعني غبتي

وبعد كتير 

تإحكي بدّي

والوجع ال كنت 

عنك إخفي

مشي من راسي 

لحد كتفي

لمين غيرك 

بشكي همّي

لخالي والا لعمّي 

يا إمّي؟ 

اببوس إيدك 

سامحيني

وإرضي عنّي 

وخلّيني

شوفك بنومي 

تأعرف نام

ويحلى يومي 

وتتحقق الأحلام

يا كل الحب 

والسلام

يا أغلى 

من كل الكلام

يا إمّي! 

بقلم الشاعرة … فاطمة البلطجي 

لبنان /صيدا