منى عبد الرحمن تكتب ألف عمر من الأنين

ألف عُمر من الأنين

أمينة… مالِك مش كده
بتبصي فِ مراية الحنين
هُوَّ انتِ ليه متأكدة
إنك عَبرتي عَ السنين
وكبرتي فوق العمر عمر
وألف عمر من الأنين
والصورة واقفة فِ المراية تفكرِك
على كل خط من الخطوط فوق الجِبين
توازيها كَسرة روح
وحَسرِة قلب
وأمنيات اتبخرت
راسية آثارها علىٰ.. جفن العنين
وفوق خدودِك مُنخفَض
طالِل أساه علىٰ ضَفِّتين
باكية الشفايف بالسكوت
أيام تفوت
أيام بعُمر
عمَّالة تحكي علِّلي ضاع
أحلام كتير
خابِت… بِأَمر
وقعِت علىٰ شَط الزمن
رجليها غارِت فِ الكهوف
غرقِت بعيد
وجَه بدالها موج ألم وقَلْع خوف
وآديني ماشية ف مُنحَنىٰ
داخِت خطاوي سِكتي
والوقت ضَلِّم واستكان
جُوَّه غياهِب خِلوِّتي
أمينة… فُوقي وسلِّمي
لأمر خالِق دنيتِك
وارضي وإمشي ف سكتِك
وادعيلُه خالق كل كون
يراضيكي… بال كُن فَ يَكون
أمينة…
فوقي وكَمِّلي

إسمعي الكلام بقه خنقتيني

كلمات الشاعرة / منى عبد الرحمن