…………… نـــــــــوار ……………

…………… نـــــــــوار ……………

كلمات
معوض حلمي شاعر عامية

كل اللـي عدى ومضى ذكـرى
……… كل اللي جاي ف الفـضا أقدار
فابدر تقـاوي زرعـــتك فكـره
……… دا الخير بيجي ف ثورة الأفكار

خليك ملاك ع السكه يملاك نور
واوعاك تماشي حد عاش بالزور
وطير وغني زي طير مسحور
……. واوهب غنـاك للتــوته والنـوار

الدنيا ماشيه ولسه دايسه عليك
الشمس قاسيه بتكوي نن عينيك
إنده لفــجر الشقشـقه يهــديك
…….. يغـسل ذنـوب الشـك والأوزار

الرحله ماشيه لفيييين موديه
الحـر قــــايد ســـيح النــيه
ماتقـوم وعدي ميت معديه
…….. لاجل المـواني تفتح الأسـرار

البرد مدد في الغيطان عابها
والرعشه غول وسانه مخلابها
وفي بعهودك واوعى تخلابها
…….. واوعاك تحود ع الودع والزار

واوعاك تعيب تبقى م العايبين
الحب نعمه حب ناس غاليين
مد الخـطاوي ف سكة الشاريين
……. خدهم ف حضنك دا الزمن دوار

وان جار زمانك تلقى أحضانهم
لو صوت أنينك رن ف ودانهم
تلقاه جميلك طب ف ميزانهم
………. هايردوا كيلك لو حفان قنطار

وان طار حمامك حط ف غيطانهم
يفرح يغـني حـــــــلو ألحــــانهم
يسكن بناني الحب ف حيطانهم
……… يملى بهديله الحلو وسط الدار

كل اللـي عدى ومضى ذكـرى
……… كل اللي جاي ف الفـضا أقدار
وابدر تقـاوي زرعـــــتك فكره
……… دا الخير بيجي ف ثورة الأفكار
…………………………………………..
كلمات
معوض حلمي شاعر عامية