فوفا قالت

ان القصايد مجدليّة وفيها سر وليها روح

وان اناشيد الصباح..هي اناشيد الجروح

وان الحكاوي بتسبق الضل بذراع..

وان الكنايات مُغرضة .. ومعناك مشاع

وان السبيل وابن السبيل ..حُكم وشروح

فوفا قالت..

الملأ حسبة قلق من ضمن باقيك البخيس

والذكريات سجن وحيطان وساعات ونيس

فاختار تكون ساعة رضا او بسمتين

او ضحكة تايهة في عز زحمة كلمتين

قد أفلح من  عاش اسد او مات فطيس

فوفا قالت..

نُط سور المعضلات..وانهج في سرّك

واعصاك وتُب لك قبل ما العصيان يُغُرّك

سدد شيكاتك بالرسوم واختام وغيره

واخلع رقاتك زي ما بيخلع ..ضميره

انا لااا اظنك تلتقي اشياء تسُرّك

فوفا قالت..

قد أتاك مولاك ..من فضله ونعيمُه

فارضخ ياقفل قبل ما تصبح خصيمُه

الزوايا بتختلف حسب النوايا

الحادة جايز تنفرج من غير غِوايه

والقايمة ممكن تنعكس،علي مستقيمُه

فوفا قالت..

السكّة لسه مفرقّة الخطوات ..هِبات

والخطوة حسّه بالخلل مش،بالثبات

والازمة ..خبرة وتجربة وخلف وخلاف

والضلمة تحمد ربنا علشان ..باخاف

والاختلاف غير اللي نصبح فيه نبات

فوفا قالت…

من دواعي الفكر ..والموضه ..الشطط

ومن اصول الرد.. تبرير الغلط

ومن لزوم الخبط..انك تبتسم

ومن فنون الصد..انك تِنهزم

ومن عادات الحب .. ان يعلو اللغط

فوفا قالت..

الشمس فردت شعرها علي كتف ضلّة

والروح تمللي معشّقة بحاجات مُخلّة

والوسيلة مصدقه رجف الغايات

والقصايد مجذوبين طبل وراياات

والحسبة مايل بختها وصابتها علّة

فوفا قالت..

الحكم صادر بالوجع..والقلب قاضي

والمدة ما بتقصرش حتي ان كنت راضي

كل الحكاية .. نشينا ع الكذب المساوي

ومفرفطين المشكلة.. ضحك وغناوي

وكل حاجه تخصنا .. بنخسرها عادي

فوفا قالت..

معطياتك كلها مالهاش… نتيجة

وخُلقي ضيّق يعني يمكن نُص جيجا

وبالطريقة الكل علي كيفي وهوايا

وعشان ما فيها ربنا بيستر معايا

بألعبها كبّة وبأجبرك تلعبها سيجا

فوفا قالت..

الرحلة طولها وعرضها.. بكل الفرايض

والخيبة نصبت ظهرها وعرفت تقايض

وانا من زمان ما لمحتنيش شبه الشجر

ثابته في مكاني فرح ..حزن او ضجر

والصيغة واحدة سواء قصايد او عرايض

فوفا قالت..

كلمتينك..كدابينك..  ما يخيلوش

خط طولك زي عرضك يفرقوش

هات ماضيك واحكيك وجلجل ضحكتك

هل من جديد هيزيد فتخجل دمعتك؟

الخلاصة ..(الموت ) رصاصة ما تقتلوش

واهي فوفا قااالت

…………………………………………………

كلمات الشاعرة

عفاف أحمد التركى