الصوت الحق مات .. خلف حيطان البيوت
قلب الدار الحزينه .. بنزف نزف السكوت
برد الغدر الكثيف بيبشر بالخريف
وطني الميت كفيف .. شايل هم الرغيف
الديب أصبح أليف
فى الخير المستباح
الخوف مالي الشوارع .. م الحرب وم الدمار .
الموت جوا الجوامع .. بالغصب والإنكسار .
والغدر بفُجرُه طالع
جبروت الإجتياح
كسروا جناح الحمام .. حرقوا فروع الزتون
مدبوح الإبتسام .. ميت خلف الحصون
ميت فينا الكلام
عالى صوت الجراح
أرواح راحت بريئه .. طارت فوق الحدود
دخان يخفى الحقيقه .. وصراخ صوت البارود
وطنى المسروق بينهج بتنفس م الشقوق
وطني الأعمى اللى عايش عتمه فى عز الشروق
أحرار فى كل وادى و غليان جوا العروق
لكن محرومه تطلع
ثوره بصوت الكفاح
وطني الحقيقي مات .. أصبح حبت رفات
كومة رماد عتيقه .. طبقات نغم السكات
يادم إتساب رخيص يروى الوادى الشريف
ياقلب المستغيث صوتك عريان نحيف .
فى الزفه أهو مات عريس
أعزل من غير سلاح
الواد مجروح بيبكى .. فين أمه وفين أبوه
البنت دموعها تحكي .. العرض لمين باعوه
وطنى إتفتت خلاص
بيخاف صوت الرصاص
بقى ريشه فى الرياح
~ ~ ~
كلمات الشاعر
الناصر صلاح الدين
Discussion about this post