وعدى الريح

وعدى الريح

محمد ضباشه

وعدى الريح

وخد وياه غناوينا

ونام الليل

على مركب ما بتهزوش

لعل العقل يرجع له

ولا يحتل ولا يختل

ولا يمطر سيول الموت

على أمة ما تعرفهوش

سوى بالدم

وضربة بطش بِتْسَقَّط شواشي نهار

فى حفرة نار بتتاوب

لكن نارها ما تحرقهوش

ولا تبعهوش

بكدب كتير بدون تبرير

وزفة خلق كدابة  فى عرس كبير

وحبة طير

على لحد اللى مات واقفين

بيقروا فاتحة مفتوحه على روحهم

بدون تهليل

كفاصل بين دموع ودموع

فلا نرجع ولا نجزع

وصوت الموت بقى واطي

ما تفرقهوش

ما بين صاحى وبين ميت

هنا لحظة

ركام العار بقى مغنم

لمين هيشيل

ومين يبنى غناوى الغربة من تاني

عشان يرجع يشوفها الموت

فتبكى الرحمة فى قلوبنا

على قصة وبالها طويل

قرونها بالعويل تشهد

بأن الرأي للخواجات

وصوت الحق بقى باطل

ولم الشمل من حزنه

وقع فى البير

فلا تبكوا على غزة

ما دام عانت

وجيرانها برغم الشوف

ورغم القرب ما حَسُّوش