الازمة نكأت جرحها اتحلّت …

كلمات الشاعرة

عفاف أحمد التركى

الازمة نكأت جرحها اتحلّت..

نذرت سمار وشّها ..دليل لغضب الشمس..

لضمت معاني الضي في ثيابها..

خرقت قانون المهلكات باللمس..

واضعين سهام للكلمة لو ضلّت..

دكّين قلاع المعجزات بالهمس..

الحكمة خطّت عقلها بنجاح..

فرضت جباية عاللي يتهوّر.

.والقلب طبعا عمره ما اتصوّر..

قام امتعض واعترض لأنه طبعا.. حس..

بُعدا..لحسن الظن..من شكّي…

بُعدا لهذا الشك عن سببه..

شرط الهداية احتار ..فاترفع حاجبة.

سلّم زمام القافلة لنهار..

تأتأ جناب الليل ومش عاجبة..

…….. مصاب بداء الاسئلة جدلا..

ضرب الكناية في عرض مغزاها.

. يحلم معاني ..ويصحي ينساها.

. وكأن فتحة عينه يعني الموت.

.ايهما اصدق..الضي والا الصوت.

. مين اللي حصر البحر جوّه الحوت

..مين اللي خلّي الخوف يقين..

ومين عرف… ايّان مُرساها..

سطر التجلّي ..والا فضلُه عليك..؟؟؟؟؟

النور مداخل لكل شئ حواليك..

زيح الستاير بس ما تعدّيش..

افتح بيبان روحك بس سُك الشيش

.. النفس أمّارة..

ادخل براح الحضرة بالشارة..

ربّع ايديك واخشع عشان تفهم..

…….. فجأة اتنفضت وقمت من نومي..

الصوت بيسري في قلبي وهدومي

..والضي نوّر عتمة الاوضة..

مين اللي عبّي هيكلي بحِسه

..ومين اللي كان بيرد ..ويسلّم

هل كنت قبل الغيب بكام خطوة.. ؟؟..

وازاي رجعت لوحدي جوّه منام.. ؟؟؟…

مش شرط ألاقي سبيل لتفسيري..

كل الحكاية انا كنت مين غيري..

وهابقي فين لمّا هارجع انام؟؟؟؟!!!!!.

……………………………………………………

كلمات الشاعرة

عفاف أحمد التركى