ماهو النايم لو اتدروش …

كلمات الشاعرة

عفاف أحمد التركى

ماهو النايم لو اتدروش

يشوف الحلم بالمقلوب ..

…..

وما بين غياب الوعي والحضور في الروح

كان عزف نور .. من لحم رباني

وما بين نزوح الاوردة ..والبوح

كام سلّمة مبنية ..بيقينك

خطّي الحُجب ..واسندها من فضلك ..

يا رفيق وجعها ..المغتصبها برضا

يا فزعة الافئدة ..وقت الشهيق والصمت

بتنفي ليه الشطط .. دانا لو عقلت ..اتعمي؟

يا قلبك المريمي ..اللي انجلد بك دهر

انا اللي خدني الشعر ..دبدبني مطرحني

طلسمني وشرحني ..معني في عيون الناس،..

يا سحبة الاحساس ..لمّا الوتر بيئن

علمني كيف بـ يحن ..ويشق توب دمعي

علمني اهز الوجع.. من غير رُطب اشواق

خدني لبطن الهوي… واجمع حروفي فراق

..اطلق جنونك خيل ..لمواكب العقلاء

واشهر سلاح بيفوح ..بالمسك والجاوة

وبصمتك العنبري.. وبـ خطّك الكوفي..

واسبل صلاة النبي.. علي قلبي وكفوفي،

وان شاء ..يشاء ويكون

اصعب ما في الامكان ..انك تكون مجنون

بتشوف بروحك بس ..وعينيك بتتكلّم

بتعكس التفسير .. وتصلّي وتسلّم

يحيا الجنون والطيش والحكمة لو ببلاش

منحة إله بتتبعت .. علي جناحات عصافير

ياخدك براق ويطير.. الي منتهي المنتهي

يا رجفة الصلصال.. لو يتنطق اسمها ..او ينذكر في الملأ

يا ربكة المفترق ..لو انكتب لي لُقاك

عاصب عينيك بايديك .. والكل يستعماك

وانت بتضحكهم من كل قلبك دمع..

من برا تل جليد..من جوه سايح شمع..

وفتلتك روحك ..بالسر ..والشاهد

يا صبرك العابد.. بمعربدين الصبر

بالجبر ..لونك خشع .. وبقيت ونس وسؤال

وبقيت تحِف الشجر …و تحمحم الغيرة

بتعدّي ع السيرة .. بسُترة المُدّاح

والليل .. يضيق بالذنب .. وبالتوبة يبقي براح

فـ زيد في قولة مدددددددد ..تنفتح طاقة

امتي الجنون اتكسف.. يبقي له اتباع؟

امتي اللي باعه الزمن ..حس بشبع او جوع؟

و امتي قلبك بِكِي..هج وخرج م الطوع؟

دي كلها تفاسير ..يا رفاقة ..يا مباركين

يا مصدّقين ع الحلم ..ومبسملين الغيب

كرف الماورد الريق.. حس العطش بحنين

وانا جاهزة للريّة .. من باب طلوع الروح

يا منامك الدرويش .. ويا حلمك المدبوح

سطر الغياب في الوعي ..

خلّا الحضور ..مسموح.

……………………………….

كلمات الشاعرة

عفاف أحمد التركى