صـدفـة

كلمات الشاعرة
وفاء على

صحيت من نومي مشتاقة
وقلت هاشوفه إيه المانع؟
كتبت وقلت له حبيبي..

هاقابلك ف الكافيه إياه
سخيفة الدنيا من غيرك
ومش حاسة بأي حياة
بصوت مخنوق وكله مرار
بيتأسف لي من تاني
ورايا ميعاد
وشغل كتير
وصفقة جديدة شاغلاني
ويعني خلاصة الموضوع
بيتكرر ده من أسبوع
وننهي محادثة ع الواتساب
وانا كاتمة ف عيني دموع
مشيت مش عارفة رايحة لفين
ما حظي النحس ملازمني

ساقتني روحي ع المسرح
دخلت يادوب بداية العرض
سرحت شوية ف ملامحه
لقيت الدمع أصبح سيل
وشق طريقه جوه الأرض
بقيت مش سامعة الا ضجيج
صوات ونحيب وصوت غربان
موسيقى عالية وحزينة
وساد الصمت وقت
آدان
لقيت كل الوشوش باهتة
وروحي بتتخلع مني
مشيت والخطوة تقلانة
بقلب جريح
وحتى الريح معانداني
وصوته مازال محاوطني
يرج بنبرته وداني
عامود النور بقا خافت
ولا الشمعة
غيوم وسحاب بلون اسود
ف عز الصيف
وصهد بيغلي كالبركان
وجو مخيف
ورغم ان القمر كامل
ماهوش باين ولا منور
تراب الأرض زي بارود
بيغلي ورافض الخطوة
صحيح ان الهوى غلاب
وله أسباب وله سطوة
وفجأة لقيته قدامي
ماهوش قاصد وجات صدفة
على الناصية بلا مواعيد
وقف فجأة وانا بعدي
ودمعي بيجري على خدي
مع نظرة ولمسة إيد

رميت نفسي ف أحضانه
ونشف دمعتي بايده
صحيح ان القدر غلاب
جمعنا بعد شوق وغياب
ورتب تاني مواعيده
ف بان وسط النجوم البدر
وغطانا بأنواره
وغنى الطير ف لاح الفجر
وانا لسه ف أحضانه
بقيت بالحب ملبوسة
ف قربه قلبي متهني
بتبعدنا الظروف غصبًا
وصدفة تقربه مني
—————————-
كلمات الشاعرة
وفاء على