نورا عواجه تكتب … أنا والجن العاشق

أنا والجن العاشق
بقلم … نورا عواجه

بداية أنا عارفه أن ده موضوع شائك ومعقد وله أبعاد كتير (وأنا مش أهل فتوى دينيه ولا علمية ) ومقدرش أجرؤ حتى أقول رأيي حتى لو صح…
لكن فى الفترة الأخيرة أصبح أغلبنا بيشتكى أن الدنيا مش مظبوطة معاه .. ال يقولك مش عارف أشتغل ..وال يقولك بشتغل كذا شغلانه ومفيش بركه فى الفلوس
وال مش بتكمل له جوازه
وال ديما تعبان ومهما راح لدكاتره
مفيش فايده وال مش بيعيشلها أولاد وال وال
كل ده موجود فى أغلب البيوت
(والأغلبية) شايف أن ده بسبب الأسحار والأعمال أو الحسد …
طبعاً السحر شيء مذكور في القرآن ومحدش يقدر ينكره
وأنا شخصياً حصلت معايا مواقف كتيرة خالص متعبه وكانت سبب فى حاجات كتير صعبه حصلت فى حياتى وحياة أولادى وكانت حاجات مش مفهومه وملهاش أسباب منطقية ، لأنى كنت بشوف بعينى حاجات كتير توضح أنى حد عملي سحر .. ولما سألت كذا شيخ
ردوا أن ده فعلاً سحر وال قال حسد وال قال جن عاشق … أقوال كتير ومكنتش عارفه مين الصادق ومين الكداب ..
((وبما أنى مش جهة فتوى ولا أهل علم علشان أناقش الموضوع ده دينياً ولا أجرؤ)) ،
حبيت بس أوضح تجربتي الشخصية مع الموضوع يمكن حد يستفيد .
المهم أنى والحمدلله على كل حال
وبالرغم من كل المعاناة ال شفتها والخسائر العظيمة ال خسرتها إلا أنى قدرت أخرج بنفسي من دائرة المشايخ المغلقه ال ملهاش أول من آخر . وال لو فضلت ألف وأدور فيها كنت هتجنن ، ليه بقي
لأن العقل الباطن له دور كبير جداً في القصة دى بمعنى أن لو حصل أى موقف غريب فى حياتى وسألت شيخ وقالى ده سحر أو عمل بالتالى أنا هبقي مهيأة نفسياً إنى أربط كل أحداث حياتى الباقيه بالموضوع ده حتى لو غلط . وده فى حد ذاته تدمير لعقلى وقلبي . ثانياً أيه ال يأكدلى. أن المشايخ دول فاهمين ودراسين فعلاً وعلى قدر من تقوى الله والخوف منه سبحانه ..
بمعنى أن الحسد حاجه والسحر حاجه تانيه خاااااالص . والسحر له كذا نوع وكذا طريقه وطرق علاج مختلفه لكن إحنا مع الأسف عملنا كوكتيل
وأغلب المشايخ ال بنتعامل معاهم مش عارفين يفرقوا أصلا بين ده وده ..وبيشتغلوا على الوهم والحالة النفسية للإنسان التعبان ..ال ممكن ميكنش عنده حاجه من الأساس…
وبعد ما قعدت مع نفسي كتير وفكرت هو مش السحر ده موجود ؟
وال بيسحرنى أو بيسحر أى حد ربنا شايفه ومطلع على أعماله ..؟!
مش ربنا قادر أنه يبطل سحره ويرد كيده ؟!
وطلعت بنتيجة واحدة
أن أنا أو أى حد بيتأذى بسبب السحر والأعمال ربنا سبحانه وتعالى له حكمه فى الأذية دى
ليه … لأنه زى ماقال( فيتعلمون منهما مايفرقون به بين المرء وزوجه )

قال أيضاً فى كتابه العزيز ( وماهم بضارين به من أحد إلا بإذن الله )
يعنى ربنا له حكمه من كده ،
طيب أنا كشخص مبتلى أعمل أيه ؟!
أولاً أكون على يقين أن النفع والضر بيد الله مش بإيد الشيخ فلان ولا الشيخ علان …يعنى ابعد بقدر المستطاع عن أى حد مش ثقه

ثانياً .. لا ملجأ من الله إلا إليه
إتمسكوا بربنا ياجماعه مفيش أحن ولا أرحم منه علينا .. دعاء وإستغفار وقرآن و كثرة الصلاة على النبي يكفي بها همك ويغفر ذنبك
وأرمى حمولى على ربنا مش البشر
وحصن نفسي بالوضوء والأذكار
وأخيراً مفيش مانع أنى أسمع نصيحة الشيخ الموثوق فيه المعالج بالقرآن فى حدود المسموح
عن عـبد الله بن عـباس رضي الله عـنهما ، قــال: كـنت خـلـف النبي صلي الله عـليه وسلم يـوما، فـقـال: ( يـا غـلام! إني أعـلمك كــلمات : أحـفـظ الله يـحـفـظـك، احـفـظ الله تجده تجاهـك، إذا سـألت فـاسأل الله .وإذا اسـتعـنت فـاسـتـعـن بالله، واعـلم أن الأمـة لـو اجـتمـعـت عـلى أن يـنـفـعـوك بشيء لم يـنـفـعـوك إلا بشيء قـد كـتـبـه الله لك، وإن اجتمعـوا عـلى أن يـضـروك بشيء لـم يـضـروك إلا بشيء قـد كـتـبـه الله عـلـيـك، رفـعـت الأقــلام، وجـفـت الـصـحـف). رواه الترمذي وقال : حديث حسن صحيح