ميزان مُختل …

————————

كلمات الشاعرة 

وفاء على

وبعد يومين خصام وبعاد

وبعد ماشوقنا طبعا زاد 

انا وانت وتالتنا الحب 

جمعنا ميعاد 

يومين كان الشجر حالف 

مايطرح غير عتاب مع لوم 

وعصافير الهوى هاجرت 

وحل مكانها جيش م البوم 

وحتى الأرض مكلومة 

وصرخت ف انفجر بركان 

سحاب من حزنه قام وزع

 دموع نازلة ف كل مكان 

وبن بيشكي من هجرك  

ورافض يسكن الفنجان ☕

وصورة خارجة م البرواز 

بتسألني وما لقيت رد 

ف نزفت من وجعها اللون 

ورسمت خط طول مع عرض 

وقسمت روحها ع الحيطة 

ف نسجت م الوجع أحزان 

يومين م البعد خلوني 

أحس بحالة م التوهان 

  بقيت إدمان 

وقلبي ليك كتاب مفتوح 

رجوعك نوّر العتمة 

وقربك رد فيا الروح 

داويت الشق من لمسة 

بقيت ليا سفينة نوح 

وحضنك بس كان مرسى 

ياريت ما تغيبش عني ف يوم 

ولا تهجر ولا تقسى

ده من غيرك أكيد يعني  

الميزان مُختل

وقربك وحده كان قادر 

يكون الحل 

————————-

كلمات الشاعرة 

وفاء على