فرسان العامية ..

فرسان العامية …
بقلم … أحمد سليمان

سمعوني الناس بحكي الحكايات
تشبه ابيات من شعر الخال
مخزون احزان جوه الجوابات
يامنه حراجي دا كان رحال

فاجومي حزين والدنيا كمين
والثوري النوري ابن الهلافيت
و الشعب جعان اصبح مسكين
دا الفول واللحمه لهم حواديت

قال عم جاهين عجبي وعجبين
يا سبيله منين لساه عطشان
كان شاب وشاب عمره لالفين
فزورة عجيبة عن الاحزان

الشعر دا كيف بيهد الزيف
يضرب بالسيف زي الفرسان
ينحاز للحق وقولة لأ
وقصاده بيركع أي جبان

الكلمة تدور وتلف بحور
و صداها بيوصل أخر الكون
تحكم بميزان والحكم امان
العدل في طبعه يصد الذور

للشعر حصون وقلوب ماتخون
اصل الحرية دي زي الدم
الدنيا تهون في الغربة يصون
لجلك يا بلادي بننسى الهم

عشق الاوطان في الشدة يبان
تخلق ابيات مكتوبة بنور
شعراء و كتاب زي الفرسان
كل الاديان للحق تثور

مافيهمش دخيل والحبر دليل
اشهد ياتاريخ و احكم يا زمان
دواوين دواوين عشاق النيل
محفوره سيرتهم ع الجدران

وعمار يا بهية والف عمار
معشوقة مابين كل الأشعار
أجيال بتغيب بعدها اجيال
تكتب عن حبك معني الدار

غابوا الأساطير لكن حاضرين
تسمع اصواتهم في الاركان
من قلب الحارة يا مستمتعين
شعر العامية دا له فرسان
…..

بقلم … أحمد سليمان Ahmed Soliman