برغم البُعد محبوبى

كلمات الشاعرة
…. يامنه اليمنى
ــــــــــــــــــــــــــــــ
خلاص خلصت قفلت الباب
مافيش أحباب
نسيت انا نفسى والماضى
نسيت كل اللى كان بيطعمنى
أمل كداب
مايستهلوش
معاهم واضحة وصريحة
وحياتهم زيف عليها رتوش
ما يهتموش غير بروحهم
وروحى بينهشوا فيها
تملى بيظهروا عيوبى
ولعيوبهم مايلتفتوش
وانا اللى كنت بخفيها
جرالكم ايه
سنين عمرى ولياليها
بترخص ليه
خلاص خلصت قفلت الباب
ماتهتموش
بقيت انسانه مش منكم
ما بشبهكوش
وما لهاش لازمة معرفتى
بأسامى ناس قلوبها وحوش
خلاص هبعد
وانا عارفه البُعاد حجّار
فى حيط قلبى تملى يهد
ف أستقوى على وجعى
وهتحمل
بمر الصبر هتجمل
وهعمل
بين قلبى وبينهم سد
وأكتب يافطه على عمرى
بإن البُعد بقى أفيد
ونقفل جرح م الأيام
ف قلوبنا تملى كان أزيد
خلاص خلصت وروحى معاك
وهاخد بالى انا منك
ومش هنساك
ف خد بالك منى فى روحك
عشان هفضل ليوم الدين
انا سكناك

كلمات الشاعرة
… يامنه اليمنى