سرقوا الصندوق يامحمد لكن مفتاحه معايا

سرقوا الصندوق يامحمد لكن مفتاحه معايا…
بـقـلـم … نـورا عـواجـه

أسمحولى فى المقال ده أحكيلكم تفاصيل سرقة تعرضت لها أنا وثلاثة أشخاص من خيرة الناس أحتسبهم من الصالحين ولا أزكى على الله أحد . وتشهد لهم سيرتهم الطيبه ورصيدهم من حب ومودة وإحترام فى قلوب الجميع وأنا أول الجميع وليا الشرف ،
دى مش سرقة فلوس ولا حاجات ماديه . ياريتها كانت كده .
دى سرقة أفكار ومشاعر إتجسدت وأتكتبت وخرجت للنور ولقت إستحسان بعض المتابعين الكرام من حضراتكم ..
حد سرق أفكارنا ومشاعرنا ومش بس كده . ده بلمسة واحده مسح كل سجل المقالات بتاعنا من سنيين !!!

طبعا هتسألوا ازاى وليه ..؟!
أقولكم كنت أنا وبعض الزملاء الأفاضل بنكتب فى أحد المواقع الإلكترونية( بدون أجر طبعاً )
بعدها بفترة حبينا نروح مكان تانى أفضل وأكبر لأننا أولاً وأخيراً أحرار
ولينا الحق نكتب فى أى مكان طالما مش بناخد مقابل من حد ولا كتبين عقد ..كنا فاكرين إن الناس مخها كبير وعادى وأنهم عارفين أن سنة الحياة هى التغيير والتنقلات
كنا فاكرين إن الناس دى عندها أمانة الكلمه ال بتكتبها وبالتالى هتحافظ على كلمة غيرها ..
لكن مع الأسف كنا غلطانين وطيبين زيادة عن اللزوم .
تركنا المكان وذهبنا إلى آخر بمنتهى سلامة النية .. لكن للأسف سلامة النية دى مكنتش متوفره عند غيرنا ، إتفاجئنا أن الناس دى اول حاجه لغت الصداقه . قولنا عادى … حرية شخصية
لكن ال مكنش عادى لما لقينا الناس دى مسحت سجل مقالاتنا كلنا وبالكامل من الموقع عندهم وبالتالى مش هنلاقيها حتى على جوجل( وإحنا مع الأسف مش محتفظين بها حتى فى أجندة )
طيب حضراتكم تسألوا هو عمل كده ليه ؟!
لمجرد تفكيره أننا مدام مش معاه يبقي منبقاش مع غيره ..
وعلى فكره الموقف ده بيحصل معايا أنا بالتحديد للمرة التانيه من أشخاص مختلفه ..
عاوزه أقول للناس دى . على قد ماكنتوا كبار بقيتوا صغيرين ،
ولو كنتوا فاكرين أنكم لما تمسحوا مقالاتنا وشغلنا تبقوا أذيتونا تبقوا غلطانين لأن الحمدلله قلبنا ال حس وعقلنا ال فكر ومشاعرنا ال جسدت الفكره وإيدينا ال كتبت لسه موجودين بفضل الله بس . وبفضل الله قادرين نكتب مليون مقال تانى أحسن وأروع ويلاقي نسبة مشاهدة أكبر .
والحمد لله ربنا عوضنا بالأحسن مع ناس أفضل وأرقي وموقع أكبر .. وأنتوا خليكم فى تفكيركم المريض وأنانيتكم ال مش هتجنوا من وراها غير الخراب مش لازم دلوقتى ، بس أكيد ربنا مش هيسيبكم وهيخلص حقنا ، ولا تحسبن الله غافلاً عما يعمل الظالمون إنما يؤخرهم ليوم تشخص فيه الأبصار..
ربنا يهديكم ويهدى نفوسكم المريضه لأننا فوضنا أمرنا فيكم لله وحده .
أسأل الله أن يردكم اليه رداً جميلاً
وحسبنا الله ونعم الوكيل