نورا عواجه تكتب .. الغلابة فى رمضان

إنتصف شهر الخير والرحمة
ولكن لم نري من التجار لا خير ولا رحمه !!

فمازالت مهزلة الأسعار مستمره ومش عارفه والله الناس لو مرحمتش بعضها فى شهر رمضان هترحم بعض أمتى ؟!

حاولت أمسك نفسي كتير أنى مكتبش عن مهزلة الأسعار ال حاصله لكن مقدرتش بعد مليون موقف شفتهم بعينى وعشتهم وسمعت عنهم .. يخلوك تبكى بدل الدموع دم ،
الوضع بقي بشع بكل ما تحمل الكلمه من معنى وميرضيش ربنا ومفيش ولا دين ولا مله يرضوا بيه . إحنا بقينا عايشين فى غابه حرفياً القوى يأكل الضعيف
والكبير يأكل الصغير وفى الإخر المواطن الغلبان عديم الحيله هو الضحيه..
ياناس أتقوا ربنا ،
التجار ال عندهم بضاعه متخزنه وبسعر أقل وبيبعوها بزياده سواء سلع تموينيه أو ملابس أو مفروشات أو أدوات كهربائيه .. كل حاجه زادت وبتزيد وهتزيد ، طيب الزيادة دى إحنا نجيبها منين ؟!!
عمري ماشفت أسعار بتزيد كل يوم !!
حرام عليكم . إفتكروا الناس ال رزقها يوم بيوم وممكن تقعد بالأسبوع والشهر من غير شغل . إفتكروا البيوت ال إتقفلت من أزمة كورونا ورجالتهم قاعدة من غير شغل لحد دلوقتى .
بصوا على محاكم الإسرة فيها كام قضية بسبب أن الزوج مش بيصرف على بيته مش بمزاجه ، ده غصب عنه . وكام ست سابت بيتها ورجعت بيت أهلها بسبب قلة الفلوس . أتقوا الله يا كل واحد قادر تبيع بجنيه أقل ومابتبيعش .
أتقوا الله يا كل واحد قادر تساعد غيرك ومبتساعدش ،
أتقوا الله يا كل مسوؤل فى إيدك تساعد الناس وتخفف عنهم ومبتعملش ،
ياناااااااس ياهووووه . الناس ماشيه تكلم نفسها قسماً بالله ، يامسوؤلين إنزلوا الأسواق وشوفوا دموع الستات وقهرة الرجاله
ال كل حلمهم يأكلوا أولادهم أى حاجه ومش عارفين .
اللحمه والفراخ والسمك وحتى البيض بقوا حلم ، الدقيق والرز والزيت والسمنه محدش عارف يشتريهم ، الخضار ومش هقول الفاكهه لاسمح الله .فاكهه أيه ده حتى يبقي بطر وذنب أن الناس تفكر تاكل فاكهه ،
المواصلات والعيش وحتى ساندوتش الطعميه ال هو أقل حاجه ممكن الواحد ياكلها سعره زاد ،أسعار الإدويه ال ركبت صاروخ ، والجواز للناس ال عوزين يعفوا نفسهم من الحرام بقي كابوس من غلاء الأسعار الجنونى ال مش عارفين واخدنا على فين .

مصر البلد الوحيدة ال الغنى فيها بيزيد غناه والفقير بيزيد فقره ،
لأن الطمع والجشع من أكبر مسوؤل لأصغر مسوؤل هو الغايه والهدف مش مهم على حساب مين وإزاى ،
المهم المكسب . ويغور الغلبان فى مليون داهيه وإيه يعنى كلب ولا يسوى . وينتحر الناس علشان مش لقيين يأكلوا عيالهم . وحسبنا الله ونعم الوكيل ،
أنا بناشد كل المسؤولين والتجار أتقوا الله وإفتكروا أنكم هتتحاسبوا قدام ربنا (وقفووهم أنهم مسؤولون )
حالات الإنتحار والسرقه والزنا والطلاق فى زياده مخيفه وكل ده بسبب الأسعار .
الغلابه ياناس ، أتقوا الله فى الغلابه ،
الغلابه ال موجوده طول السنه مش شهر رمضان وبس . الغلابه ال بتدخل السوق تبكى وتطلع فاضيه مش قادرين على تمن كيلو باذنجان يقلوه لولادهم .
فين الرقابه على التجار ال بيزودوا بمزاجهم ولا خايفين من ربنا ولاخايفين من حد ،
مش بس التجار . الدكاتره والمدرسين واصحاب المحلات كل واحد عايش فى وضع معين مش عاوز يتنازل عنه أبدا وبرضوا على حساب الغلابه ،
ومحدش خايف لأن كلها سلسلة مصالح مربوطه فى بعض ،
وبناشد الغلابه إل أنا منهم قدم شكوتك لله الذى لايغفل ولاينام ،
وإياك تتفرج على التليفزيون فى رمضان أحسن تموت بالسكته القلبيه من كتر الحزن والقهر ال بتشوفه فى إعلانات الفيلات والكومبوند وأنت عايش تحت الارض ، أو وأنت بتتفرج على مسلسلات عديمة الهويه بتكرر نفسها كل سنه وكلها سفاله وإنحلال وقلة أدب وكل هدفها يبعدوك عن دينك وقيمك ومبادئك ،
المسلسلات دى هدفها الأول والأخير أنهم يلهوك ياغلبان أنك تفكر فى عيشتك وفى نفس الوقت هم برضوا يستفيدوا من نسبة المشاهده ، وبعدها يقبضوا ملايين وانت مش لاقي تاكل ، أوعى تسمع البرامج ال يطلعلك فيها مذيع يقولك تقشفوا وهو لابس ساعه بمليون دولار والتانى يقولك اصبروا وهو بيفطر بفخده ضانى ، مش كفايه أستفزازهم للغلابه بتصريحاتهم ال تحرق الدم وتعلى الضغط ،
الغلابه ال فى كل الحالات هم كبش الفداء ، الغلابه ال عملوهم شاورمه
طول الوقت وشهم للنار وضهرهم للسكين وبيلفوا على سيخ محمى وبيقطعوا من لحمهم وفى الإخر يأكلوهم ،

وأنا لله وانا إليه راجعون ،

وأخيراً رساله لأهل الفضل
رب رمضان هو رب شوال ورب كل الشهور .يعنى ال يقدر يواصل الخير بعد رمضان ميتأخرش ..الناس الغلابه هتفضل غلابه طول ما احنا عايشين فى الغابه دى
وأنا لله وأنا إليه راجعون

ألا قد بلغت اللهم فاشهد ،