ياسر بسيوني يكتب كنت قبلك

… كنت قبلك …
ياسر بسيوني
كنت قبلك أرض بور
تنزل المطرة بخاف
يطلع الصبار ف جوفي
وتطول بي السنين العجاف
وطعم المر يملا حلقي
حتى لو كلت الحلو حاف
أنحت الحرف ف سطور
يخرج لي منها الجفاف
امتى يشق نبتي نور
ويرتوي ف نهاية المطاف
أرضى كانت مالحة وشراقي
مفكوكة من كتر الشقوق
لو جيت تضمني تلاقي
روحي مش قادرة تفوق
هو احنا لسه فينا روح
ماشية بالعكاز معانا
ولا فارقتنا لفوق
كنت قبلك ١٠٠ كتاب
وكل صفحة كتبت همي
كلهم مر وعذاب
حتى عنوان الغلاف
السعادة كلمة واحدة
والحزن محفور بالآلاف
والفرح حالف ما ييجي جنبي
صفحة بيضا ما عشتهاش
صفحة غامقة وصفحة بني
وصفحة مروية بدمي
وصفحة مش فاكر .. بلاش
بلاش نقول الدنيا قاسية
القساوة دي ف قلوبنا
نشوفها عارية وهي كاسية
واحنا من جوانا دوبنا
دابت الطيبة وحسن المعاملة
من امتى يا خلق الدنيا كاملة
دي ناقصة واللي يتمناها ناقص
خلي الأصل أساس وطبعك
واللي يخالفك منه بناقص
ليه دخلت جوه روحي
حاولت تلملم جروحي
دي السعادة بعيشها جنبك
ولحظة البعد بتبقى نوحي
يا سفينتي وكل نوحي
لما مطرك جه رواني
فرحت وقولت عشت تاني
ساعات الفرحة حياة
حتى لو كانت ثواني
كنت مجهول الهوية
ومين لكل الناس رواني
روحي رجعت تاني ليا
لما سهمك جه رماني
….
ياسر بسيوني
٢٠٢١/٤/٩