يام الغنا تسابيح …

كلمات الشاعر … نسيم الزراع

يام الغنا تسابيح
الحلو كان سكر
يابسمة النوار
قلبي اللي عاش أخضر
لما اتكوي بالنار
ولا كانش متصور
ف الحب من أسوار
تحجب شعاع الضي
قلبي اللي ميت حي
ف الحب كان مغوار

يام الغنا تسابيح
هزي شواشي الريح
انا قلبي مالو زي
حبك وداب واستوي
والنبض منه اتهري
من بعد ماكان ني

ياعطر شوق هزني
سهم العيون مسني
ودخلتي جوايا
يام العيون غايه
رشيني فوق صدرك
اسكن حنايا الروح
واعصر ندا عطرك
واشرب لحد مافوق
واسكر علي ثغرك
من رشفة القبلات

يالا اطلقي العصافير
تسكن ضلوع نبضي
قلبي حسبته أسير
لحسن أوصافك
محتاج لميت تفسير
ولميت حياه تانيه
والله متوفي
من بعد موتي انا
راح تدبل الدنيا
لو عمري مليون سنه
والله مايكفي
“””””””””””””””””
( الحب مش بس نبضه
تسكن جدار القلب
دا القلب محتاج لخضه
عشان يعيش الحب )