كارمنسيتا …

بقلم الشاعرة والكاتبة … نيفين جابر

كارمنسيتا
مش صوره مرميه..
على طرف باب بيت شعر
ولا غنوه منسيه..
لحن افتكاره صعب
الشكل.. لحوريه
والفعل.. جنيه
والاسم –بيقولوا-..
ف الاصل/ انسيه

ماكانتش كدابه
وده فعل تمنه الموت
لو يعنى صدقنا ..
اكذوبة انك حي
مش شرط احلامك/ تملك تحققها
وده منتهــــــــــــــــــــــــــــــــــــى….
ضعفك
الحلم كان مخلوق / لجلن يشوف النور
الحلم بات مخنوق ..
يوم ما ارتجيت ضعفك /يفتحلك المقفول
يوم ما ارتضيت كونك/ ف دنيتك مفعول
يوم ما اشتكيت خوفك/ و سمحت انه يقول..
الزم هنـــــــــــــــاك ركنك

غجريه
غجريه على طرف القلوب تتشاقى. .
وتدوووووب / وما تتوبشي
وما تشوفشي ..
ف عينيها دموع
وبتقول (لأ) بدل ال (آآه)
وتتلون بألف حيااه
عشان تكسر سكون الموت
وبتفوت. .
على جسر الألم بعناد. .
وضحكايه
ودي.. حكااايه
تجلجل. . ف القلوب تشتاق
تزلزل. . كل ركن بخوف
بإدراك اللي عدى الشوف..
بتعلن خطوه الجايه
مفيش وشين. . عشان تكدب وتتجمل
مفيش غشين. . عشان جواها تتحمل
فلا بتكدب على روحها
ولا بتوهب ل (غير) روحها
ولا بتوهب لغير (روحها).. براح الروح
ما تملكشي الا تهواها
ما تملكها الا .. بهواها

بقلم الشاعرة والكاتبة نيفين جابر