ماحبتنيش …!!

كلمات الشاعر
نبيل عبد الرحمن

ماحبتنيش
وضاع العمر وياها
وعاش القلب يهواها
وباعت كل شيء بيننا
ورفضت أن قلبي يعيش
ماحبتنيش
أنا الساحر و برسم ضحكة على وشي
عشان أسعد جميع الناس
يدوب الصبر من صبري
يلين الصخر من أمري
وهبت لها سنين عمري
مليت الكأس
أشوف الفرح في عيونها
وأضحى بروحي علشانها
وفرحة عمري عنوانها
وطعم الفرحة ناسيانى وماعرفهاش
ماحبتنيش
رسمت الضحكة في عيونها بساط أخضر
حنين وورود
كتبت بايدى علشانها فى نهر الشوق
كلام ووعود
ولو غاب طيفها عن عيني
دموع عيني تحن لها
رسمت بروحي جنتها
عزفت بايدي مواويلها
ولما الضلمة تملا الكون
عيوني تبق قنديلها
يانار الهجر يامواعدة حطام قلبي
ياقايدة و لسة مابردتيش
ماحبتنيش
أنا أسف
بقيت من دنيتي خايف
عشقت الحب لجنونه
كرهته لحبك الزايف
ياشجرة غدر زرعتها رياح الخوف فى ليل عمري
وبعد الحب حصدتها العواصف
وكنتى فى جنتي حوا وكنت ف جنتك درويش
ماحبتنيش
زرعت الفرح على بابها جناين توت
رميت لى الود فى غيابي بشوك الغاب
انا الكداب
عشان كدبت يوم ظني
وشوفت الجنة في عيونها
وانا بدونها
كطفل جريح
بدور عالحنان فيها
وعطف الدنيا مايكفيش
شبكت إيديا فى إيديها
بكل جحود ما ضمتنيش
ماحبتنيش
أنا إللى عشقت من قلبي
وتاهت روحي عن دربي
وأتارى الذنب كان ذنبي
عشان سلمت يوم امري
فى إيد واحدة ماترحمنيش
ماحبتنيش
أنا البلياتشو في حياتها
وخطوة يادوب في سكتها
داستها لاجل توصل يوم
انا الحدوتة قبل النوم
ولعبت ياما بمشاعري
وشالت قيمة من سعري
سنين وشهور تفوت تجري
وبعد ماكنت دنيتها
لقيتنى بغدرها مهزوم
وحنت إيدها ويّا ايديه بدون تفكير ومن دمي
بتدبح فيا لاجل عنيه ولا بترحم ولا تسمي
أنا القصة إللى كانت زيف
وكنت النسمة بتحاوط هوا عيونها فى ليل الصيف
انا إللى وهبت ليها ضلوعى تحرسها
وكافئتني بضرب السيف
ياريتني ماكنت حبيتها
ياريتني ما كنت خبيتها
ما بين القلب والشريان
عشان فى نهاية الرحلة ماتقتلنيش
ماحبتنيش
يابايعة وعدك الزايف عشان قهراً لقيتي بديل
وانا إللي عشان وفيت وعدك
ومن دونك صبحت قتيل
هصالح دنيتي واهدم
فى قلبي بيوت ما بتساعكيش
وأشوفك قصة بهتانة
خيانة وذل وإهانة
وجرح كبير مايلزمنيش
يا ريتك بعد موتي بلاش في يوم تبكى على قبري
وتشكي الوحدة و الحيرة
ماتلزمنيش دموع واحدة ماحبتنيش