ياقاعدين يكفيكوا شر الجايين …

بقلم … نورا عواجه

فجأه يرن جرس الباب يجيلك ضيف من غير إستئذان ،
من غير معاد سابق ولا حتى تليفون تلاقيه جايلك عشمان ،
وقبل ماتستوعب المفأجاة تلاقيه أنتشر فى كل مكان ،
وياريته لوحده ده ولاده بيجروا ويتطنطوا على العفش كمان ،
ولما يشوفك مذهول يقولك
كنت جمبك قولت أفأجئك مالك مش فرحان ،
ترد تقوله أنا بس لسه راجع من شغلى وببقي راجع تعبان ،

ليه ماأتصلتش تحدد وقت مناسب ؟؟
يستغرب قوى ويقولك هو أنا غريب يا جدعان .
حتى لو كنت قريب الزيارة ليها آداب وشروط بنراعيها فى كل آوان ،
إتعلمناها من ديننا ورسولنا وأتربينا عليها فى بيوتنا زمان ،

كل واحد فينا بحكم علاقاتة سواء الأسرية أو الإجتماعية لازم بيزور حد أو حد بيزوره
سواء لوحده أو مع أسرته أو أصدقاء فى الجامعه أو العمل .
طبعا ده شيء جميل وكل الأديان حست عليه . وربنا أمرنا بصلة الرحم والسؤال على بعض ، لكن بشروط وضوابط لازم نتلزم بيها كلنا علشان يبقي مُرحب بينا ومنبقاش مصدر إزعاج لأى حد .
قبل أى حاجه وأهم حاجه أن الزيارة دى تبقي خالصة لوجه الله ،خالية من الرياء والسمعه .
مش بزور قريبي علشان الناس يقولوا أنى بصل الرحم ،
كمان متبقاش الزيارة لهدف خفي أنى عاوز أعرف أخبار الناس دى أو غيرهم أو ليا مصلحة عند أصحاب البيت ،
ولما نقرر الزيارة لازم ناخد معاد سابق قبل الزيارة من أصحاب البيت ونلتزم بيه

قال تعالى: {يَاأَيُّهَا الَّذِينَ آمَنُوا لَا تَدْخُلُوا بُيُوتًا غَيْرَ بُيُوتِكُمْ حَتَّى تَسْتَأْنِسُوا وَتُسَلِّمُوا عَلَى أَهْلِهَا}.
ولما حضرتك توصل وتخبط وتسمع كلمة مين متردش وتقول (أنا) الرسول عليه الصلاة والسلام نهى عن الموضوع ده . قول أسمك على طول .وتلتزم بالمعاد ده حرفياً ،مفيش حاجه أسمها أنتظرنى بعد الضهر وتروحله الساعه ٦ ،أو أنتظرنى بالليل
وتروحله الساعه ١١ بالليل ، ده شيء غلط جداً ،
لأن حضرتك كده ممكن تضيع على صاحب البيت كام ساعه فى الإنتظار على الفاضي
وهو محتاج يرتاح أو يعمل مشوار أو يستقبل ضيف تانى ،فلازم نلتزم . هكون عند حضرتك الساعه ٧ يبقي ٧ بالظبط حضرتك تكون عنده ، والزيارة على قد المناسبة ،
يعنى منطولش قوى ،
كمان تبقي موضح للناس أنت رايح لوحدك ولاحد معاك .
ولو حد رايح معاك يكون الشخص ده له لازمه اكيده فى الزيارة دى . علشان أكيد الناس بتحب تقدم واجب الضيافه . فبلاش تحرجهم ، محدش عارف ظروف الناس والبيوت مدرياها الحيطان .

ولو روحت فعلاً وخبطت على الباب ومحدش فتح ،
ليك ٣ مرات إستئذان زى ما ربنا قال . محدش رد ترجع وأنت مش زعلان لأنك متعرفش ظروف الناس أيه .
كمان مفيش داعى بإصطحاب أطفالك لو مفيش ضرورة لوجودهم لأن ده غالباً بيبقي سبب لكسر أو كركبة حاجة لأهل البيت وده طبعا شيء مزعج .حضرتك مش هتبقي مبسوط لو حد عمل كده فى بيتك ، كمان مفيش داعى للمفأجاة كنت جمبك قولت أعدى . ولا كنت تحت البيت قولت أشرب الشاى معاك . ياناس الوضع أتغير جداً عن زمان ، أيام ماكنا بنزور بعض فى أى وقت . ونقدم للضيف أى حاجه . والضيف كان مرحب به ومصدر فرحه لأهل البيت .دلوقتى بحكم العمل والدراسة ظروف البيوت كلها أختلفت عن بعض الأغلب شغال شغلتين والأولاد مابين دروس خصوصية ونوادى . وست البيت مابين شغلها وشغل البيت . ربنا يكون فى عون الجميع ، كمان مفيش داعى للتليفونات فى وقت متأخر لأسباب تافهة حتى لو إحنا عارفين أن الناس بتسهر ،منتصلش الا للضرورة القصوى ،
لأن كل واحد من حقه يرتاح ويحس بالخصوصية فى بيته
ويقضي وقت مع نفسه من غير أزعاج علشان يقدر يكمل
اليوم ال بعده ،
وربنا يجعلنا ديما خفاف لطاف على قلوب الناس قبل بيوتهم ومرحب بنا بس فى الأوقات المناسبة . ويجعلنا ممن يستمعون القول فيتبعون أحسنه ،
والسلام ،،