أنا مش ملزمه أطبخ قلقاس ياأما هصوت وألم عليك الناس

أنا مش ملزمه أطبخ قلقاس
ياأما هصوت وألم عليك الناس.

بقلم نورا عواجه

زى أى أحداث جديده بنعيشها
وأخبار ملهاش أى تلاتين لازمه من ناس فاضيه ملهمش لازمه ، تقوم الدنيا ومتقعدش
وده حال التريند الأخير ال طلع فى المقدر جديد أن الست مش ملزمه تطبخ ولاتكنس ولا ترضع ، الست مش ملزمه لا تفلى ولا تقلى ، الست مش ملزمه تطبخ القلقاس ياأما هتصوت وتلم عليك الناس . ومش ملزمه تفتح الباب لجوزها ومش ملزمه بأى حاجه ،
الإخبار والتصريحات الشيطانيه دى لو مش هتأثر علينا وعلى أولادنا وعلى بيوتنا نقول زى بعضه ونعديها ،
لكن لو هتخرب البيوت العمرانه والبيوت ال لسه هتتبنى وتبوظ عقول البنات والستات يبقي لازم نقف ونقول لا ومليون لا بعزم مافينا .
وأنا كأم حابه أوجه رساله للأمهات بصفه عامه والبنات بصفه خاصه المقبلين على الزواج ، الجواز عمره ماكان علاقة ندية ولا دبح القطه ولا جوزك على ماتعوديه ،
وأوعى تطبخى وأوعى تكنسى ، وأوعى تسكتيله وكرامتك فوق أى إعتبار وأرميله العيال ،
ومليون نصيحة كلهم غلط فى غلط ، مفيش من وراها غير خراب البيوت . لأن الجواز زى ما ربنا قال مودة ورحمة ، حب وإحتواء وبناء بيت مليان دفا وحنان وإنجاب أولاد بارين أسوياء ينفعوا نفسهم وبلدهم ،
فلو البنات والستات سمعوا لنصائح خَرَّابات البيوت دول هيخسروا كل حاجه .
لأن غالباً الفاشل فى أى علاقة زوجية أتدمرت هو الست .
الست ال ترفض تطبخ وتكنس وتكوى وعاوزه تاخد فلوس على رضاعة أولادها
هتبقي أجيره ، لا هى زوجة ولا حبيبة ولا أم ،
الست ال بتحط رأسها برأس الراجل فى كل صغيرة وكبيرة هتفقد أنوثتها ال ربنا خلقها عليها ، وهتحرم نفسها من أجمل مشاعر الأنوثة والإنتماء لشريك الحياه ،
والأم ال ترفض ترضع أولادها هتحرم نفسها وإبنها من إحساس الأمومة ال ملهوش وصف . ومشاعر حضن الأم لإبنها وهى بترضعه المليان حنان وحب وإحتواء ،
مظنش أن فى ست عاقله تحرم نفسها من الإحساس الجميل الرائع ده !!
طيب لو الرجاله فى المقابل قالوا إنهم مش ملزمين يشتغلوا ويصرفوا على البيت أصلاً ، ولا ملزمين بعلاج الست لما تمرض ولا بكسوتها ولا يفسحها ولا يجيب هدايا ولا يموت صرصار ولا يضرب فأر . ولا يفتح برطمان ، ولو دخل حرامى البيت هو مش ملزم يقوم يمسكه يبقي أيه الحال وقتها ؟!
طيب مفيش سند شرعي بيقول أن الزوجه مش ملزمه تنكد على جوزها ليه هههههه؟!
ياناس إحنا مش فى حرب ومينفعش بأى حال من الأحوال نشوف الجواز أنه علاقه ندية أوأستثمارية ونتخلى عن فطرتنا ومشاعرنا ال ربنا خلقنا عليها ،

لازم نفوق شويه ونبطل نسمع لكل من هب ودب ،
مش كل واحد أو واحده فسر آيه من القرآن على مزاجه يبقي عالم .
لأنهم غالباً بياخدوا النص ال يعجبهم ويوافق هواهم وتفكيرهم المريض ،
وزى ما فى رجاله تستاهل الدبح وأن الست تاخد عليه محضر بعدم التعرض من قبل حتى ماتتجوزوا ،
فى رجاله برضوا تتشال على الرأس وجوا العين ، وإن الست تعيش حياتها كلها تحت رجليه . معرفش فى أى كوكب بس موجودين هههههه ،
وال مش عاجبه الكلام من الطرفين مش ملزم يتجوز أصلاً ويفضل فى بيت أبوه يريح نفسه ويريح الناس معاه ،
ياريت نرجع لأصل القرآن والسنه ونفتكر تعاليم ديننا
قال رسول الله صل الله عليه وسلم (تركت فيكم ما أن تمسكتم به لن تضلوا بعدى أبداً كتاب الله وسنتى )
صدق رسول الله صل الله عليه وسلم ..