حلي الضفاير
للشاعر نسيم الزراع
طلة ملامحك
ترسم الطير إللي سارح
ف العروق…
نبض الشقوق
جوايا لسه بيرتوي
من ريق صباح العطر فيكي
ويغني للصبح اللي راجع
يبتسم
يلمس ملامحك ف الغصون
وقت اغتصاب العطر
من جوف الورود
حين ينفلت بوحك وروحك
تنتشي جوايا نور
خضة عروقك واغتراب الدم
ف الشريان
سكرانه روحي ف واحة النسيان
وانا اللي عاش فيكي
خجل نعسان
لا مره بله المطر ولا كان
في وقت الخطر
إلا حجر صوان
منقوشه مابين الوله والروح
ياضحكه حيرانه
طعم ابتسامك رقتك
شره العطش بينز من جتتك
ياقله شرقانه
غرقانه فيكي السكك
والتوهه سرقانه
همس العيون لساه بيتواعد
حلي الضفاير وافردي
فوق النهار طهرك
شميت عبير الأمل
لما اتفرد شعرك
خجلانه ليه العيون
والنبض ليه مرعوش
قلبي اللي متروك ف الندي
أنا لسه مدخلتوش
إوعاك تلوم القدر
كل القدر تصاوير
مالت فروع الشجر
واتهجرت عصافير
والناي ف حضن الوتر
هز الضلوع تخدير
إزاي هنصعد للفضا
وجناحنا لسه كسير
موعود أنا بيكي
أسهر أناجيكي
وافرش رموشك ع المدي
تباريح
قلبي اللي صابه العطن
جوايا لسه جريح
ردي البيبان
ولا تتركيش روحي عريانه
النبض زي الشجر
لو مره هزه الريح
ياخده علي خوانه
ياللا ادخلي جوايا روح
واقفلي كل الضلوع
علي قلبي زنزانه
…..
كلمات الشاعر
نسيم الزراع
Discussion about this post