وانت راجع..

وانت راجع..

هات معاك تمن الغياب ..

حضّر اللي ما قلتهوش فـ سنين طويلة

افرد  الشال اللي دفّي كتاف حنيني ..واتنخل

هات  ونيس غير  افتراض سيناريو  واحد

..اتقلب علي كل شوق

ارمي طوق للبااااش بعيد.

.وارتجل اقصر مسافة تلملم التواريخ في جيبك ..

إستلفهم يوم ما ساب ايدنا الطريق..

ورجعت مَشيْ في ليل وداعك ..

بـ ألضّم الاحزان في كُمّي ..

إستلفهم  لو باعوك من غير ما تدري..

واشتروا بالباقي منّك اي حاجة باقية فيك

..استلفهم واستلف عمرين عليك

وانت راجع..

ابقي راجع مُلهماتك ..

كام قصيدة فرشها قلبك لحكاياتك؟ ..

كام محطة سيبت عينك رغرغتهم ..؟

كام  خسارة  استوطنت في سنين حاشتهم

..جوّه صُرة متعانه لك وقت حوجة ؟؟

.طًلّعتهم ضحكتك علي روح غوالي

..فرفطتهم دمعتك علي باب عينيك ..

وانت راجع ..

مِد قلبك  قبل ما تمد فـ  ايديك ..

قبل ما تكُر في خيالك .. قبل ما  تبروز  ماضيك ..

قبل ما انعي فيّ حبك..قبل ما  تشتاق اليك ..

وانت راجع..

سَكّر المر  اللي مرمر فيّ روحي ..

سمّي وانحر فيك جروحي ..

واغزل المعني المرادف لاشتياقي ..

ململ الخوف اللي ململ كبريائي ..

اقطف الوردة الوحيدة  في بور كيانك ..

قيم صلاتك قبل ما ترفع اذانك ..

فرق توقيتك اعانك ..شقّ فيك غربة ورجوع ..

بسملك  وِردين خشوع ..  فرّقك نذر وشموع..

اصبحت عايش مش عشانك

وانت راجع..

عوّد الأحلام تفسّر لون منامك ..

علّم الصمت اللي  مش فاهم كلامك

..يستوعب الرغبة وعنادي..

ترجم الشوق لا ارادي ..

واستعيد خصلة في مشاعرك لسه بِكر ..

يخطفني حضنك  جوّه ذكر

..اغيب تغيب ..يترد شوفك من قميص  قسمة ونصيب..  وانت  راجع املا كفّك من سيرة العشق وصحابه..

فُك طلسمته بثوابه ..

وافتح الليل عاللي يعرف..يفتل الصُبح فـ جِرابه..

وانت راجع

فك صوتك من  جراءته واحتجابه ..

وسيب بشيرك يسبقك

مطلوق غيابه.

وانت راجع..

غنّي ع الليل اللي اخدك تحت باطه..

زمزم الضحك ..بعياطه ..

حوش مناب البُعد وابعد عن سياطُه

كذّابين والله فيك سطرين انينك  ..

كذابين فـ الدمع عينك ..

بس صدقوا يوم ما اشرق حبي فيهم

بان عليهم .. والكلام مشنوق في جوفهم

وانت راجع .. غنّي ع الليل اللي صاحبك..

علّمه كام جرح صاح بك .. لكن انت ما  إلتفتّش

علّمه يطمع في حبّك .. علّمه ازاي يفتّش جوه روحك

عن جموحك وانت ناوي تسيب بيبان الآه مواربة

وانت راجع.. اصلب الحلم المِنعوِس فوق جبينك ..

واستعيذ به  لمّا طرف التوب يحِنن ضمّتينك

لمّا  كل حروف قصايدك ..تنطقك من نن عينك

لما هتسافر وترجع .. هتلاقيني

غربتك ..

وطنك ..

سنينك .

……………… ……………….  ……….   …..  ّ ……  ……..

كلمات الشاعرة ….عفاف أحمد التركى