التوقعات الزائفه،،،،،، عن الزواج

التوقعات الزائفه،،،،،، عن الزواج

بقلم نورا عواجه

فى مقالى السابق   ( عريس يابوى ) الأسبوع الماضي كنت قد وجهت  رساله للشباب المقبلين على الزواج ورساله أخرى للأباء والأمهات الذين يطرقون الأبواب خاطبين لإبنهم إحدى الفتيات ، فى الوقت الذى ربما يكون فيه هذا الأبن غير قادر على تحمل تلك المسوؤليه الجسيمه ، أو تكون الإبنه غير مؤهله لتصبح زوجه وأم وربة منزل ،

وكانت نصيحتي للطرفين الآ نُقدم على تلك الخطوه الخطيره إلا إذا تأكدنا من التأهل الكامل لها نفسيا وماديا ،

وفى هذا المقال أردت تذكرة الشباب والفتيات بشيء مهم جدا يجب أن يعوه ويحذروا عقباه ،

الآ وهو الصورة الخاطئة عن الزواج في عقولهم ،

بمعنى إن الشاب والفتاة واخدين صورة وردية جداً ورومانسية لأقصى درجة عن الزواج . وهذا خطأ فادح يؤدى إلى صدمة كبيرة فى المستقبل عندما تصطدم أحلام الحياة المثالية بصخرة الواقع المرير . والتي تحتاج لمعول لا غصن زيتون ،

وهذا ليس معناه أن الزواج جحيم لاقدر الله ولكنه ليس كما يتصور الشباب أنه جنة من الحب والغرام والفسح والهدايا والشموع وأن سبب المشاكل الزوجية غباء وجهل الأزواج اللي مش بيفكروا زينا،

الزواج يعنى حياة  جديده ، ومن الطبيعى ألا تخلو الحياه من المُنغصات والمشاكل .والزوج أو الزوجه ماهو إلاشريك لمحاربة تلك المشاكل الحياتيه واليومية على أساس متين ربنا سماه ميثاق غليظ وسكن من المودة والرحمة والاحترام المتبادل .والتضحيه من الطرفين ،كمان الأهم من كل ده أن كلا الطرفين يبقى فاهم أنه هيتعامل مع إنسان مُختلف عنه فى الطباع والسلوك ،بمعنى إن البنت اللي بتتربى فى بيت ( أبوها بيساعد مامتها فى شغل البيت .أو هو ال بيطبخ أو بيكوى الهدوم وهو المسؤول عن البيت مسوؤليه كامله) مش شرط أبدا أن جوزها يكون كده ،

والمفروض إنها متزعلش أو تعمل مشكله لو لقيته عكس كده ، لان ده مش عيب أخلاقي فيه . لأن نفس الزوج  ده ممكن يكون فى بيت أهله مامته أو أخواته البنات هم ال بيعملوا كل حاجه ، أو أن مامته بتساعد فى مصروف البيت ، فتيجى العروسه ترفض ده تماما وتطلب أنه يساعدها فى شغل البيت خاصة لو كانت بتشتغل هى كمان . وممكن ترفض أنها تساهم فى مصروف البيت لان ده من مسؤوليات الزوج الاساسيه فى الزواج  ، وقتها بتحصل مشكله أوصدمه مش محسوبه بين الطرفين ،

علشان كده لازم الطرفين يبقي عندهم وعى تام بالامور الفارقة دي ويعرفوا أن شريك حياتهم عاش عمره كله فى وضع مختلف ولسه هيتأقلم على الوضع الجديد ، والمطلوب شوية تفاهم وكثير من الموده والرحمه علشان المركب تمشي زى ما بيقولوا ،

وينسوا كلمة بابا كان بيجيب وكان بيعمل . وماما كانت بتدلعنى ومش بتتعبنى .

مش من المنطقي إن الراجل ياخد دور والده بجوازه من واحدة مش أمه ، وإن البنت تاخد دور أمها في جوازها من شخص مغاير تماما لأبيها في محاولة بائسة لإستنساخ تجربة مفيهاش عوامل مشتركة والنتيجة مسخ ،

فلازم هم الإتنين قبل الجواز يتفاهموا على كل ده بكل صراحه وشفافيه ومحدش فيهم يقدم للتانى ووعود هو مش هيقدر ينفذها لإن الطرف التانى بيصدق وبيبنى أحلام ورديه على الوعود دى ،

والله أسأل أن يرزق شباب وبنات المسلمين الزوجات الصالحات والازواج الصالحين ،

وأن يرزقهم الراحه والسكينه والاطمئنان ، والعمر المديد فى موده ورحمه أنه ولى ذلك والقادر عليه ،