الشعر توب أبيض
لايق على العفاريت
يا مدخلاني المدى
ومحضرة الأرواح
خدتيني ساحة ندى
بتفرجي السواح
قلمي عصى المفردة
وعصاني لم عصيت
مع إنه كان العصى..
له معجزات اشكال ..
بيحل لغزك إذا …
كان ع الورق إشكال ..
انا ما اشتكتش الألم ..
لكن لقلمي شكيت
فكتبتا عهد الرضى …
في معظم الحواديت
فرحك فتن بسمتي ..
طلعت بدون مكياج
خلتني اكركر وجع
واتجرع الحوارات
ليكي وعليكي إنما
ليه تدخليني وسيط
ونقشتي إسمي الخفي
على معظم المساخيط
رع تون سومار اتحومس
مينار خاتون رمسيس
ناظير يا من علقت..
أسراره ف الكواليس
سبع طلاسم رضى
وسبعة غيرها عجاف
وسبع تلاف م الزمن
وانا بتولد وبموت
يا أمي يا مدهشة
في ملتقى الكهانوت
كيمت ،ميسِر، تامحو
حِت كا بتاح ،تاجرو
نفس الطريق والخطى
والبهرجة الملفتة
واللي عليه العطى
هو اللي ها يباركوه
ندهاني اسجل حدث …
ولا امدح الموعود
وانا من قديم الأزل
ناقشك على الجدران
ليه مصرة تتفرعني ..
وتنادي ليا عنيد
مع إن كفي اتفني
وانا بنقش التوحيد
الله واحد أحد
ومالوش في ملكه شريك
بصيت لقيت القلم
فتح عينيه لتنين
وقالي يا مدعي …
الشعر جبته منين ؟
قولت له ابويا السبب
قام قالي هاتله مثال
واكتب نظير كلمته
واوعاك تكون طبال
ما عجبتش المنتقد ..
ابو خمس مية لحلوح
لوحت ليه بالحدث
اخده لسفينة نوح
من يومها سبت الورق
وخضعت للتحريف
كلمات الشاعر
عبدالله على نظير
AbduAllah Ali Nazeer
