رغماً عن الجرح اللى علِّم
جوّا قلبي سنين وفات
ورغم كل المُمكنات
والوجع م الممنوعات
والحضور ، والغياب
أنا فعلاً جدا حبيتك
مش ذنب وتكويم أسباب
ولا عرض بنود ، ولا مين غلطان
أو مين إتساب
كتير أسئلة وبدون إجابات
ومعلمة ف الروح ندبات
وطريق نمشيه دايما مسدود
أقنعة نلبسها ونتدارى
من برد الروح من جرح بينزف
مااتداوى لساه مفتوح
ومعري الحتة ال ما تابت
مابتتعلمش من الغلطات
ولا بتسيب بابها موارب
للمهزوز ف مشاعره وفايت
أوراق وَرده ف وش الريح
أنا جداً حبيتك جايز
ولا ف دماغي يوم ماقابلتك
إن هزيمتى الخايبة ف حُبك
بالنسبالي كنت الفايز
بعترت مشاعر واتهانِت
واتقابلِت ببرود وجحود
ووأدتني حتى ف أحلامَك
رديت بابَك مفتحتوش
وأنا حُبي من النوع الفاخر
لسّاه بِكر مجربتوش
حُب صحيح ، برشام ساحر
مش كَسر من الهدد البايت
ولا هزلي وساخر وعبيط
ولا لون باهت للي باعوك
أنا حبيتك أيواً جداً
ولا هبقى ف يوم نُسخة ونِداً
وطبق الأصل من الل خانوك
وان زِدت ف أوجاعي وهانت
هفرش سكة طريقها مساوي
قللها قناوي ، وضِلة وبيت
وأحوَّط على عمري الباقي
من التخبيط
مش هقبل أبدا ببواقي
ولا أسدد فواتير وخانات
وتِنشع روحي ف بطن الزير
وافضل دايرة ف سواقي
ويبقى فراقي رغماً عني
قلب ف حبك … طَب ومات
كلمات
الشاعرة رضا عبدالوهاب
