وصية قلب
وعدى العمر يا عمري
وانا واقفة محلك سر
يجف النبض ف عروقي
وجوايا يسقط مُر
دموع روحي
في قلب الصرخه حبساها
هنا في السر
يعدي الليل
ومليون ليل
بلا احلام
بلا نجمات تواسيني
في عتمة نفسي إلاكم
روحي فداكم
ولو باقي في عمري ساعات
راح احلم اعيشها وياكم
ولا غيركم يا نن القلب باقي لي
يا نبع حنان بيرويني
منيش ندمانه على فكره
ولا قلقانة من بكره
ولا عمري ح اشيل الهم
مادام انتم في احضاني
مسير كل الهموم تتلم
وانا لساني مشدوده
وممدودة الحياة خضرة
راح اتخفى انا فيكم
وح افضل ع الصعيب قادرة
وح انسج توب امان بيكم
بيبعد كل عين غادرة
ايدكوا الماسكة ف ايديا
قلوبكوا الهايمه حوليا
حدودي و صورتي و البرواز
يا سقف ودروه تحميني
جدار من صلب ما انه ازاز
دي رنة صوتكوا دي قوتي
وطلة روحي وسطيكم
شفره لصحوتي و موتي
ما هو انتو القوة والعكاز
وليكو الخطوة سابقاني
ودقة قلبي ساكناكم
وسايباني
معدش بيضوي جوايا
سوا عيونكو انتو اسراني
القلب نشفت اغصانه
وارضه الخضرة صبحت بور
لغيت كل الصفات منه
بكلمة ياامه بقا مستور
نزل مليون ستار فوقه
وعاش وياكو اجمل دور
وح افضل عند عهد الله
ام تلملم الفرحة
و اب جسور
ولما العود الصلب يميل
ووجع العمر يسيبه هزيل
والروح الدايبه تتقسم
مابين اللهفه والتدليل
والحبل السري اللي رابطنا
يغزل حوالين منه قلوع
والبدن المهزوز من خوفه
مصلوب ع الصبر كانه يسوع
كونو ليه تراتيل
ولما يقرب م الاخر
والنور م الروح راح يتاخر
مش عايزة الا ابقى ف وسطيكم
واديكو الناعمة تسبلني
من غير دمعات
وحياة من فرق خطاوينا
الدنيا الجايه ما فيها عياط
كلمات الشاعرة
سارة زيادة
Discussion about this post