أحلام ورق
بقلم/ سلامة أبو النجاه
أحلام ورق ووشوش سراب
دخان سيجاره بتتحرق
على صهد من فرط العذاب
قصاقيص مشاعر منهكه
عاشقه البكا تحت أنقاض الخراب
والباقي من عمرك نفس
خايف يطل من القفص
يصبح في أحضان الفضا
ويبات في غيمات الضباب
كل النفوس متجرده
سكوتها مش إبن الرضا
الصمت في الواقع
ردود منسوجه بخيوط العتاب
مكتوب على حلمك يموت
من قبل ما يشوف الولاده
الجثه يحضنها التابوت
والدفنه ينقصها الإراده
على وقع صيحات السكوت
الحزن عشش عنكبوت
والباقي من حلمك قطع زي الرمم
لما تنهشها الكلاب
الصرخه يولدها الألم
والدمعه من رحم الأنين
لو مهما يسترها الخجل
تفضحها صرخات العينين
الحلم مات عز الصبا
وبرغم شح الأجوبه
تاهت معاني الأسئله متسوله
داخل متاهات الجواب
إحلم كمان
وافتح ضلوعك مقبره للحزن والأشجان
وادفن بواقي الفرح في بطون الجراح
زي الرفات لما يكسيها التراب
على بعد خطوه من الأدان
نصبوا الصوان
الكل شاحب في العزا
والصفحه من فرط الأذى
متبروزه رافضه يطويها الكتاب
معظم آلامك مبرحه
وبرغم كم الأضرحه
عاشت رفات الأوليا
كالأنبيا لما يحضنها السحاب
أحلام نغم
وحضور غياب
والشعر لما بينفطم
يتوضا من ثديها ويصلي في المحراب
…………………………………….
أحلام ورق
كلمات الشاعر
سلامه ابو النجاه
Discussion about this post