هستيريا …

   كلمات الشاعر

وحيد علي الجمال

هستيريا …

هتعرف يعني تتسامح

وتضحك تاني وتصالح

ماظنش يعني راح تقدر

ولا يمكن في يوم تقبل

وشوش (كالحها )

تبان صالحة

في توب كدبها الفاجر

 تعيد رسمك من الأول

على بابك بتتحول

وتتسوّل بقى ودك

فترجع زي عمنول

بتغفر تاني وتسامح

فترسم صورة من صورة

و تلبس ألف (بنّورة )

في نظارة خداع نفسك

وتتهجى حروف اسمك

وتعبر بحرك الماسخ

وتجبر في الهوى كسرك

 وتتستر على عيوبهم

 و تتصالح مع غيرهم

وتزرع صبر أحلامك

مابين العذب والمالح

وتحبس مهرك الجامح

تلجم مرّ أوجاعك

وتدفع للي يوم باعك

ثمن خوفك واطماعه

تعيش ميت تموت صاحي

تفكّك سجن اضلاعي

وتتحرّر من الماضي

تذاكر قطرك الفاضي

هجر آخر محطّاتك

وساب آخر ميعاد جواك

يطوّق تاني في سكوتك

شجر صفصافك المحني

ماعدشي الصّبح يلمحني

ولا في ضلّه يمرجحني

ويحكيلك ويسمعني

خيالك نهره طوّحني

في وسط الحلم رجّعني

كابوسك فجأة صحّاني

هدّم عشّك في أغصاني

فكان لازم أموت تاني

قصايدك نبضها عالي

بتسبح جوّه شرياني

وبتقطع في أكفاني

مع رجفة خيوط الرّوح

على فهرس دواوينك

كتبت في هامش امبارح

قصيدة وطعمها ماسخ

قفلت الفيس على أصحابه

لاقيتها الصّبح نشراني

   كلمات الشاعر

وحيد علي الجمال