حُضن وبُوس

وباستَنَّىٰ الخَميس يِيجي
عشان اصحَىٰ واشُقّ العِين
واوضَّب دُوغري أشواقي
واعَطِّر كلّ إحساسي
واسَرِّح شَعري واتمَلَّا ف حَنين قلبي
ودَقْدَقْتُه
ولَهفِة روحي لمَّا اسمَع كلاكس هناك
شوية وبابي بيخبط
ويجري قلبي مِتلَخبَط
ويفتَح دُوغري حُضن كبير
وبوسَة تضُم خَد ورُوح
وعقلي يروح
عشان الحِلوَة دقدُقتُه
بترمي نفسها جواه بدون تفسير
واسَمِّي واصَلِّي وأكَبَّر
وأحمِد ربِّنا وكَرَمُه
عشان الحِلم بَقىٰ يكبَر
وَهبني إمتِداد رُوحي
وأقول يا دُنيا لا ترُوحي
وطَوِّلي فِ السِّنين حَبَّة
عشان إشبَع بحُضن وبُوس
فِ يوم مَهْوُوس
بيجري بسُرعَة ويصَفَّر
وانا أسهَر
دا لمَّا بتيجي وبتِمشي
حَبيبِة رُوحي ديلارا

كلمات الشاعرة
منى عبد الرحمن