صحصح بقى

نسجت أوجاعك خيوط
وغزلت حبل المشنقه
وحلفت تستبدلها موت
ولا يسلبوك لحظة لقى
مسكين ياوارث طبع ابوك
من بين ضلوع الموت جابوك
طب ليه غواك طعم السّكوت
وانت اللي غاوي الزقزقه
لفت خيوط العنكبوت
حول المدار
قال اللي لابد في التابوت
الموت قرار
لو كان صحيح الموت قرار
كان ليه خيار الإنتحار
وانت يانن عيون ابوك
مادقت يوم طعم الشقا
لو يوم صحاب السوء خانوك
فضفض يجوز تلقى الصدى
عند اللي فاضل من ابوك
لو نقطه من ابعد مدى
لساني سامع شكوتك
الموت مكلبش خطوتك
وبرغم كون الكون براح
لساك أسير الشرنقه
رغم انحصار
المد في بطون البحار
رغم انتحار
الضي في عيون النهار
رغم افتراق الملتقى
الشمس شبعت شقشقه
صحصح بقى

مقطع من قصيدة …. صحصح بقى

كلمات الشاعر
سلامه ابو النجاه