بقالي كتير مابكتبشي…

بقالها كتير مخصماني
ومش بتجيني في الأحلام..

بقالها كتير ما بتزورنيش
ولا بتملّي عيني كلام..

بقالي كتير بناديها
في عز الليل بناجيها
بحلفها بضي عينيها
تحسسني اني لسه بعيش..

بقالي كتير وانا تايه
وداير في البلاد سواح
لا انا عارف لفين رايح
ولا قادر بجد ارتاح ..
ونفسي تجيني واحضنها
وجوه عيوني اسكَّنها
واقفل روحي على روحها
عشان من تاني ما تسيبنيش..

بقالها كتير بتوحشني
أروح لصورتها اكلمها
أعاتبها ف تحلف لي
خلاص راجعة بأحلامها
واحضَّر روحي لـِ لؤاها
وانسى عذابها وجفاها
والِم مشاعري وعواطفي
ونستناها وما بتجيش..

كلمات
الشاعر سامح هريدي