الليل قاسي

الليل قاسي

الوقت طويل

والليل ماسِك فِ إيدين الليل

مش راضي يعدِّي على بُكرة

وانا على فِكرة..؛

عمَّالة بَعِد ف خطواتُه

واحسِب بالسَّم وبالملِّلي

وأقيس صَوَلاتُه وجَوَلاتُه

والحِلم الِّلي ف روحُه فاضِلِّ لي

والأمَل الِّلي بيجري ف ضِلِّي

وأَشِد إيديه لاجل مايُعبُر

يمسِك طراطيف الفَجر الجايّ

ويسلِّم عَ الصُبح النسَّايّ

الليل قاسي

وظلامُه كمان.. مافيهوش ولانُقطة شوف واحدة

ولانِجمة أبُص لها مُناهدة

ولاضَيّ حَبيب

دايمًا بيغيب

حتى لو بَس يفوت بُرهَة

ويبص يارب بنظرة شوق

واللَّهِ هافوق

وهاسَيطَر عَ الليل القاسي

وهاقيِّدُه دُوغري ف كُرَّاسي

إنُّه حنَيِّن

راضي وهَيِّن

يمكن أيام الليل تِقصَر

وتمُر ساعات

العُمر اهو فات

والليل واقِف في وَضع ثبات

بيبُص بعينُه على امبارِح

ومخاصِم برضُه نهار بُكره

كلمات الشاعرة

منى عبد الرحمن