أنا أكثر ميت عاش

أنا أكتر ميت عاش
أنا أكتر عايش مات
مع إن الناس تقريبًا
ما مَمشوش ليّا ف جنازات

مع إني ساعات بتنفس
وأكتب بدموعي قصيدة
وبسيب دايمًا على بابي
القطة بتاعتي وحيدة

بتدوَّر جوّه دولابي
على صورتي وسر عذابي
وبتحضن كف إيديّا
وأنا قاعد وسط صحابي
بقرألي الفاتحة معاهم
مستني يلاحظوا غيابي
وأمي تعيّط وياهم،

وجروحي تبان ف إيديها
علشان مش لاقية ف أوضتي
شيء من ريحتي يسليها

أمي اللي قالتلي عينيها
مش شايفة أساسًا بيها
وسابتني ف بيت مهجور
فبقيت بشتاق للظلمة
أكتر ما أشتاق للنور

وحزين جدًا وبخاف
وبشوف فى دماغي حاجات
م الصعب إنها تتشاف
رغم إني أخدت علاج
ومُهدِّئ للتفكير

محتاج فعلًا تفسير
أنا ليه سامع أصوات
وصريخ على طول وعياط
والراديو ف بيتنا حزين

أنا حاسس إني إتنين
أقواهم نَفَسُه ضعيف
والدنيا يدوب ف عينيه
مشهد من فيلم مخيف
متفصل ظبط عليّا

أنا ملك الموت ف عينيّا
وف قلبي جروح وآلام
مش عارف أغمض أبدًا
من كُتر الاستفهام
والدود بيقولي جميل
هتدوب جوّه التفاصيل
والموت يعزمنا عليك..
وساعتها هناكلك.. أكل ..
أنا أكتر ميت فعلًا..
عايش منظر أو شكل ..

كلمات الشاعر
أمجد شعلان

Amjad Shaalan