يانبض الحقيقة اللى ساري ف حشايا
ومجرى الوريد اللى بيضُخ فيا
يا شارب ملامحي وفارد جدوري
وساكن ربوعي كشمس عفية
ياخط مسَاري اللى ممدود شوارع
وضلُه اللى بارع يضلل عليا
ياشوق مِعلّم كوَشم الصبايا
على خدي نغزة
ياحنة قناوي تنور ايديا
ورعشة نهود الهوى المستفزة
بوَشْوش حيطان البيوت
اللى واقفة مابنا
وأحنن قلوب الدروب
اللى فاردة قلوعها
كحضن تابوت وليل اغتراب
وأضم شواشي الغيطان
وأزين عيدانها على كل باب
كلهفة قصيدة لبنت مجاز
كضمة حبيب … كطعم القُبل
وقت اشتهاء الصبي … لشهقة صبية
أوصِّيك عليا .. بحق الشوق
اللى واصل مابنا
وفاتح ستايره حضن وأمان
بحق السلام اللى زغزغ قلوبنا
كبرفان يدغدغ غصون الريحان
بحق الشروق اللى جاى من عينيك
يداعب شعوري
بحق شعوري اللى ميّل عليك وكاتبك غناوي
بحق الخطاوي اللى مفرودة بنا
على غصن بان
بحق أدان العشق وركوعه
وصلاته جهرا وقصرا .. عناده وخضوعه
وترياق رضابنا اللى طعمه بيسِكر
وخمره حلال
تسافر مابين ضلوعي ماترجع
وتستنى طيفي كوقفة لعيد
ولو لحظة غبت وعز التلاقي
فراقي دا يوجع ..
وتنسى جميع الأماكن …لكن
تثبت حضورك ف مجرى الوريد
يانبضى الشريد العنيد المداوي
وأزيدك كمان وأقولك وأعيد
نبعد عن العالم دا أجمع
ونمضي غياب
كلمات
الشاعرة رضا عبدالوهاب
Discussion about this post