ده سؤال وأكيد

ده سؤال وأكيد

مستني الرد..

إزاي انا وانتي بنشبه بعض؟؟

إيه اللي بيربط بين وردة

وبين عود نعناع ..

إيه اللي بيربط بين ضحكة

وبين الأوجاع ..

أو بين القمرة اللي بنورها

بتموت العتمة وتتحول لسعادة وفرح ف عين الكل..

وعمود النور اللي وجوده

يشبه عدمه

الواقف جبرًا في الصحرا

مش شايف أصلًا م الضلمة غير جرح وذل..

إزاي انا وانتي بنشبه بعض؟

إزاي بنردد نفس الكلمة كمان مع بعض؟

إزاي بنفكر في الحاجة وبتطلع واحدة؟

إزاي ملامحنا بقت واحدة

رغم اني أساسًا مشبهكيش ..؟

إزاي انا وانتي كمان بنعيش نفس الإحساس ؟

أحكامنا ازاي بتكون واحدة على كل الناس؟

هو احنا فيه حاجة بتجمعنا

غير وقفتنا في طابور العيش..

أو لون أحلامنا اللي بيشبه

يعني همومنا..

مدرستك أم حيطان واقعة

والدكة اللي انا كنت عليها

بكتب لك كل الجوابات..

الكشري الفول والطعمية وحبة حكايات..

هاتي البراية عشان قلمي

أصلًا مبري

أستيكة عشان اجبر عينك

تلمح حرفك مكتوب على كل الكراريس..

متاريس كات دايماً محطوطة

بيني وبينك ..

لسّاها لحد الان واقفة وبتعمل حد ..

معقول انا وانتي بنشبه بعض

طب تيجي ازاي

وانتي اللي بقيتي برنسيسة

وانا لسه يا دوب برضه جنايني

محروم م الورد ..

سيبك من شغل الأفلام ..

الواقع مُر

بيمَّوت كل الأحلام ..

والشعر كلام

وقصايد حلوة بتتغني

والغٌني أوهام ..

أنا وانتي ضحايا الأيام ..

ودي أول حاجة بتجمعنا فعلاً مع بعض

أنا وانتي حقيقي بنشبه بعض

ف الجرح النازف م الدنيا ومن الأحباب

ف الفرح المتاخد دايماً من روحنا غياب

ف آهات كات يعني ملازمانا

ف ان احنا بنتَّلقى عزانا

من غير أسباب

الكل بيجي على قلوبنا

تقريبا ان احنا عيوبنا

الطيبة وإخلاص النية

وثقتنا ف ناس أصلاً شاطرة

ف الخبث دي عالم مؤذية..

أنا وانتي بنشبه حرامية

وبنسرق زاد..

وبنسرق فرح من الأيام

وبنسرق لحظات م العمر

اللي احنا ما عشناش أيامه

بنداوي الجرح وبنحاول

نخفي آلامه ..

أنا وانتي بنشبه للقمح

مطحون علشان يعلى مقامه..

أنا وانتي بنشبه لِلَّحن

العاشق يرتاح ف مقامه..

أنا وانتي بنشبه للنص

الساكن في قلوبنا كلامه..

أنا وانتي بنشبه لزمان

عاش نفسه يحقق أحلامه..

أنا وانتي بنشبه بعض ازاي

أنا وانتي أكيد أصلاً واحد

كلمات

الشاعر سامح هريدي