أنا باكتب
عشان حرفي يكملني
عشان الكلمة ماتفكرش تظلمني
عشان الشطر ياخدني لمعني عميق
عشان الشعر يكتبني وياخدني لدربه صديق
انا بكتب
عشان حرفي يطير بيا لفوق وأفوق
أسّبح في فضاه وأسرح وأتمشي في سماه و أروق
أنا بكتب
عشان الشعر ياخدكم لشط عيوني ودموعها
عشان تقروا اللي بين
الحرف وسطورها
أنا بكتب
عشان الشعر ده ملجأ
يأويني .. يواسيني ..يوريني البشر ألوان
يبدل لي السنين أيام …
بر أمان
ونتمشي ونتعشي ..
ونشرب كاس للتوهان
ونحكي حكاوي مالها مثيل
وتنسانا العيون والليل
أنا بكتب
عشان الحب جه خبط علي البيبان..ولما فتحنا سابنا وخان …
فلازم أوضح الأسباب
وأنا والله مش عارفه أيه الأسباب
أنا بكتب
عشان وجعي جبر الحروف ويا المعاني ينزفوا دم الفراق …
كبت المشاعر رغرغوا رمش العيون م الأستياء.
فانا بكتب
عشان أهرب من الأحزان
وألون الحياه وردي
وأحضنها بلا أستأذان
وأخلد ماضي كان قاسي
بسن الحرف والألوان
عشان لما أبقي يوم ذكري
يفكركم وينشلكم من النسيان
انا بكتب
عشان أبعد عن الوحده
عشان أهرب من الأحزان
وأخرج أشتري لبانه وغزل بنات ..وأرجع تاني للكلمه
وأستف ورقي قبل مانام
وأسطب وجعي علي الأرفف والعمدان
عشان ممكن أموت بكرة
وأسيب لي قصيده تبقي ترند للأجيال
انا بكتب
عشان تقرا وتعرف أني حبيتك بكل مافيا من إحساس
وقلبي بنى لك أحلي قصيدة ع الشرايين ودق أساس
ومن يومها
وأنا بكتب
ومش عارفه بكتب ايه!!
وبكتب ليه ؟
لكن بكتب …
كلمات الشاعرة
هيومة حمزة
باكينام حمزه
Discussion about this post