الشاعر الراحل / أدهم الزهيرى Adham Elzehery
الشاعرة / نيفين الطويل
زي إيه
زي لمعة ف عين يتيم وقت مابيشتاق
لاُم
زي
مية في حر قاسي
زي ماتكون كُل ناسي
زي إيد تقدر تواسي
لما حُزن الكون يعُم
زي إيه مش زي حاجة
تتوصف يكفيها بوح
في ملاك يقبض ف روحك
أما هي تضيفلي روح
أدهم
………….
زي ايه
زي ضحكه ف عين غريق لما يلقي لنفسه
بر
زي ضله ف عز حر
زي رحمه ف حكم قاسي
زي حلم وتصحي ناسي
من جماله تنسي اي اوجاع تمر
زي طيف يخطر فبالك
يلمسك تلمس خيالك
في بشر ب جناح وروح
لمسته تجبر تداوي
تمحي حبه من الجروح
نيڤين
………..
زي إيه
بيت ف وسط خضَار محاوطه
بيداديه لو مرة مال
جدة بتدلل حفيدها عُمرها ماشافت عيال
زي
نور بيضوي ليلك
زي إيد بتشد حيلك
زي مُهرة ف وسط خيلك
حُسنها يفوق الجمال
زي شيء ومَلهوش زي
والدلالة بإني حي
بسمة تطوي الحُزن طي
بنت من نسل الدلال
في إبتسامة تمُر عادي
اما هي تمر فيك
تبني م الأحلام صروح
أدهم
…………..
زي عيل تاه من امه والتقاها بعد حين
زي عيان خف وحده بعد يأس وخوف سنين
زي لو قررت اجيلك
زي سنده ترد ميلك
زي ايد فعياك تشيلك
طبطبه تواسي الانين
زي وانت مالكش زي
حلم متجسد وحي
شعر يرتجلك وينطق
بعد ما انت زهقت بوح
نيڤين
…………..
زي إيه
بَحكي عنها قصدي عنك
تحكي عنه قصدي عني
زي مثلاً تبقي مني
طب هَعوز م الدنيا إيه
زي مثلاً
جنة فوق الأرض إيدها مشبوكة ف صوابعي
تبقي روحي وتاخدي طَبعي
وقت عطشي تكوني نبعِي
والدوا اللي هَخف بيه
تبقي بيتي ووشم ثابت
تبقي ورد ف حُضني نابت
تبقي طفلة مهما شابت
كِتف بأتسنِد عليه
أدهم
…………
زي ايه
زي بنتك زي ضحكتها البريئه
زي ايه
زي صاحبك لما يفديك باللي يملك
يبقي جنبك وقت ديقه
زي كدبه بيضا نضحك أو نجمل ف الحقيقه
زي حضن الصبح لما لسه بتفتح عينيك
زي مامتك لما تتسحب ف أوضتك
روحها وتشأر عليك
زي ما انا شايفه اللي واجعك
زي مانت شايلني فيك
زي رعشه ايدي لما هاجي وهاسلم عليك
واعترفلك اني عاشقه وقد ايه
زي لما اخلقني منك من ضلوعك من جديد
واخلقك مني ول مره واحده بس تعيش سعيد
زي قلب وقف لثانيه
حب عاد النبض ليه
الشاعرة
نيفين الطويل
Discussion about this post