دور ياوابور

بيتنا   القديم  رغم  أنه  كان  طوب  ني

لو  قلت  فيه  المدد   ينده   يقولك  حي

قلبه الكانون والفرن والجرن واسع براح

وناروزه  ع الفتاح مفتوحه جايبه الضي

مكانش  ليه  مفتاح  ولارزه   ولا  ترباس

كات ستي حمده جناح وقلب زي  الماس

وجدي ابراهيم والبنات وننادي  ياهديوه

هانغني غنيوه على  صوت عزيق  الفاس

القطن  طاب  واستوى  زهزه وجاب نوار

فتح  ولوزه  استوى  عبى الغيطان  انوار

جمعنا  كام   قنطار   لاجل  العيال  تفرح

الولد  محتاج مطرح والبنت عايزه شوار

الرز  سنبل  ومال  بقى  لونه  زي  الدهب

هات الشراشر ياخال موسم حصاده وجب

نضفنا  جرن  هلال  بينادي  رزق  المواتي

دور ياوابور ع القتاتي حمل جمال العرب

نسرح ننقي العفش يجي الحصاد قناطير

وان  شق ريقنا العطش ع المشربيه نطير

ياسلام لو إيجى الغدا وف ضل صفصافه

ناكل   ونتصافى  ،  نلعب  كما  العصافير

وخير  على  الطبليه  فطير   وعيش  غله

وقعب  رايب  هديه  والقشطه  ميت فله

وخضره وبرنجان وكمان دي جبنه قديمه

دا  غموس  عليه  القيمه  والميه   م القله

والشاي  على  الشاليه  غليان  على  مهله

شاورت   للغاليه   ،   والغالي   بانده   له

صب   ياواد   للزينه  ولعمي  ابو  جنينه

وشايي  في الخمسينه مزاجي بيرتاح له

بالليل ياخال في البلد  هانقيم لنا ماحيا

وندعي  أهل  البلد   يونس   على  يحيى

بالذكر يحلى  المدد  والندر   فول   نابت

نلقى  القلوب  تابت ،  نلقى  القلوب تحيا

نلقى  القلوب  تابت ، نلقى  القلوب  تحيا

…………………………………………..

كلمات

معوض حلمي شاعر عامية