( أنا بستناك )
وفضلت أستناك أنا
واسأل عليك روحي
ياهل ترى ليه الغياب طول؟!
وإيه في البعاد خباك ويغيب ضياك
عني أنا !!!
بيجيني حاضن ضحكته
ماتكونشي طالت سكته
وإيه سكته عني؟!!
بنده على الشوق والحنين
يبعتلي روحه تخشني
ويطمن القلب اللي نازف بُعده
كيزان الوجع
ليه يا حبيب وانت الدوا ؟
وانت اللي في عنيك الأمل
حضنك في عز امشير دفا
البرد مش قلة غطا
البرد ذرة من الجفا
بتخش جوا القلب تحوله بركان جليد
ماهو إنت عارف إن ليل البُعد خوف
وان الحروف عمالة تلعن
في الغياب
وفي الظروف
طب كنت إبعت لاجل خلك شئ
يطمن وحدته
شئ يمد العمر كام ساعة معاك
دنا مت استناك ف بكرة
وبكرة طالت غربته
معرفش كام مليون وجع
بس الحقيقة
اني شفتك جوا مني
وانت بتضحك م الوجع
ااااه يا جدع
كل الحفر ف السكة والديب
والغفر مبانوش
كل الوشوش بتبص ليا وتبتسم
مجنونه أنا ؟!!!
لا يصدني مليون غفير
ولا رجلي خافت م الحفر
والديب غبي
فاكرني إني هبص له
كل اللي كان جوايا إنت
و100 فراشة ملونة حيرانه بين غصن الشجر
طب كنت تبعت
كف يمسح دمعتي
ليلة كاملة تغيبها عني !
عمري وبكايا وفرحتي
همسي وسكوني ودنيتي
كل شئ وياك ياروحي
كل شئ في العمر كله
هي ليلة
شوف هاتسوى
في حسابات البشر
كام ألف عمر؟
قسوة منك ولا قلبك كان رضي
تسهر عيوني ع الطريق؟!
وفضلت أعوم زي الغريق
اللي مابان لعنيه أمل
ايه العمل ؟
والشط مربوط في النجوم
آااه ياجبايرك
ليلة كاملة!!!
دايرة بتحاوط ساعاتي
قلبك قسي ولا نسي؟
وقدرت تنسى إن اللي
في الموج عذبه طول البعاد
ما بلاش عناد وابعت لي روحك
تنتشلني من الغرق
كلمات الشاعرة
فاطمة علام
أبلة فاطمة
Discussion about this post