نص توب من حديد

نص توب من حديد
.
.

. من سر خطوات العبور ف الكون
انك تعدي من شرنقات الليل
تعصر ف روح الصمت تُأمره بحبة حروف
تكسر حلوق الصبر. تقوله انطق
إتوجع…
اصرخ واقول موجوع اوي
اكسر سكاتك بالقوي
وكفاية دفنك تحت كلمة يستحيل
وبلاش تكرر من حروف انا مش هعيش
يمكن تعيش
وتعيش اوي
..
وبلاش تكمل ف الحياة زي دراويش الكلام
بيسبّحوا بسبحة غرام
مفروطة حباتها ف ظلام
والكدب صابح وِردهم..
والفرض حي ع الحرام.

خليك جدع…
عارف حدود الحلم ايه
ومسطّره بالمسطرة،
راسم ع ورق الزمن
كل الزوايا والضلوع
شافف ف صورتك
، ساعة الخطر ،
راسم حدود الخطوة ايه
عارف تمام وقت الرجوع

جوة السطور
تنطق ملامحك
وتقول هناك واقف بطل
وف قلب ملحمة الحياة
بيهد كل طريق غلط
وبيبني كل طريق امل

ومن قساوة الحرب ممكن
يسكن ف قلبك…
أشواق غلط
إياك تخاف..
ارمي شراع الضعف فيك
غرّق سفينتك وب إيديك..
افرد جناحتك وطير
خليك قوي
واياك تبص وراك للحظة
ف العشق قلبك كان قوي
ف الجرح قوّيه مرتين..
..
واياك تقول توب الحياة واسع عليك
وان كان اكيد
فصّل لقلبك مالحديد ..
توب من جديد.. وانزل وحارب
واضحك وقول انا قدها
اقوى ودوس
… على كل صورة ماتشبهكش
واعرف حقيقة…
فى الحياة
توب الحديد لايق عليك

كلمات
الشاعرة رباب الجورية