كَلام تَهْويش …

كلمات الشاعرة 

منى عبد الرحمن

كَلام تَهْويش …

صباح الخير على عيوني 

الِّلي مش بِتنام

صَدي الأيام…. مِصَحِّيها مِخَلِّيها

تِبحلَق بَس مِن غير صُوت

كلامها سكوت

وعايشه بدمعها يجري على الخدين

وقلب ماليه أسى مَدبوح

وطالعة الروح… وبِتْخَبَّط 

على باب السما السابعة

شَايلها سحاب على جناحُه كِده مرَابْعَة

سأل شَمس الَّنهار لطَريق

قالِت لُه إمْشي مُش بِيْلِيق

تُودَّع روح بتتألم

عيونها كلها أوجاع 

وحزن عميق ودمع مُشاع

ونزلت روحي من تاني بتتألم

وتتندم

على حاضر بِيِّكْسَر كل أحلامها 

وماضي باع ضِيا عيونها

وبُكرة الجَايّ ماتعرفهوش

يااااااربي…. حُوش

صباح مِسْتَغْرَب الطَلَّة

ونِسمة من بعيد هَالَّة 

بنظرة خوف

بقينا ضيوف على الأحلام

بقت أوهام… وتتحول إلي كوابيس

كلام تَهْويش

وفِعل مفيش

صباح الخير على عيوني 

الِّلي مش بتنام

كلمات الشاعرة 

منى عبد الرحمن